റിയോ ഡി ജനീറോ : ഈ വര്‍ഷത്തെ കോപ്പ അമേരിക്ക ടൂര്‍ണമെന്‍റ് ബ്രസീലില്‍ നടത്തുമെന്ന് സൗത്ത് അമേരിക്കൻ ഫുട്ബോൾ കോൺഫെഡറേഷൻ (കോൻമെബോൽ). ടൂര്‍ണമെന്‍റിന്‍റെ ആരംഭ-അവസാന തിയ്യതികള്‍ നിശ്ചയിച്ചിട്ടുണ്ടെന്നും ആതിഥേയ നഗരങ്ങളും മത്സരക്രമവും പിന്നീട് അറിയിക്കുമെന്നും സംഘടന അറിയിച്ചു. കൊവിഡ് പ്രതിസന്ധിയെ തുടര്‍ന്ന് നടത്തിപ്പില്‍ നിന്നും അര്‍ജന്‍റീന പിന്മാറിയതോടെയാണ് മത്സരങ്ങള്‍ക്കായി കോൺഫെഡറേഷൻ പുതിയ വേദി നിശ്ചയിച്ചത്.
ജൂണ്‍ 13 മുതല്‍ ജൂലെെ 10 വരെയായിരിക്കും ടൂര്‍ണമെന്‍റ് . നേരത്തെ അര്‍ജന്റീനയിലും കൊളംബിയയിലും സംയുക്തമായി ടൂര്‍ണമെന്‍റ് നടത്താനാണ് പദ്ധതിയിട്ടിരുന്നത്. എന്നാല്‍ ആഭ്യന്തര കലാപത്തെ തുടര്‍ന്ന് കൊളംബിയ പിന്‍വാങ്ങി. തുടര്‍ന്ന് പൂര്‍ണമായി ആതിഥേയത്വം വഹിക്കാന്‍ തയ്യാറാണെന്ന് അര്‍ജന്‍റീന പ്രഖ്യാപിച്ചു.