ന്യൂഡല്‍ഹി: ബംഗാളിന്‍റെ വെറ്ററന്‍ വിക്കറ്റ് കീപ്പർ ബാറ്റർ വൃദ്ധിമാൻ സാഹ അടുത്ത സീസണുകളിൽ ത്രിപുരയ്ക്ക് വേണ്ടി കളിച്ചേക്കുമെന്ന് സൂചന. ബംഗാൾ ക്രിക്കറ്റ് അസോസിയേഷനുമായുള്ള തര്‍ക്കങ്ങളെ തുടർന്നാണ് സാഹ ടീം മാറാനൊരുങ്ങുന്നത്. ത്രിപുരയുടെ പ്ലെയർ-കം-മെന്‍റർ റോളാണ് സാഹയുടെ ലക്ഷ്യമെന്നാണ് റിപ്പോര്‍ട്ട്.
"ത്രിപുരയുടെ പ്ലെയർ-കം-മെന്‍റർ എന്ന റോൾ അദ്ദേഹം ആഗ്രഹിക്കുന്നു. ത്രിപുരയിലെ ചില അപെക്‌സ് കൗൺസിൽ അംഗങ്ങളുമായി അദ്ദേഹം ചർച്ച നടത്തിയിരുന്നുവെങ്കിലും ഇതുവരെ ഒന്നും അന്തിമമായിട്ടില്ല. ബംഗാൾ ക്രിക്കറ്റ് ബോർഡും ബിസിസിഐയും സാഹയ്ക്ക് നോ ഒബ്‌ജക്ഷൻ സർട്ടിഫിക്കറ്റ് നൽകേണ്ടതുണ്ട്." ഒരു ഉദ്യോഗസ്ഥൻ വാര്‍ത്ത ഏജന്‍സിയോട് പറഞ്ഞു.
ശ്രീലങ്കയ്‌ക്കായുള്ള ഇന്ത്യൻ ടെസ്റ്റ് ടീമിൽ നിന്ന് പുറത്താക്കപ്പെട്ടതിന് പിന്നാലെ ബംഗാളിനായുള്ള മത്സരങ്ങളില്‍ നിന്നും 37കാരനായ സാഹ പിന്മാറിയിരുന്നു. തുടര്‍ന്ന് ബംഗാള്‍ ക്രിക്കറ്റ് അസോസിയേഷന്‍ ജോയിന്‍റ് സെക്രട്ടറി ദേബബ്രത ദാസ് നടത്തിയ പരാമര്‍ശമാണ് സാഹയെ അലോസരപ്പെടുത്തിയത്.