അൽ അമീറത്ത്: റണ്‍ ഒഴുകിയ ലെജൻഡ്‌സ് ലീഗ് ക്രിക്കറ്റ് ഫൈനലിൽ ഏഷ്യ ലയണ്‍സിനെ വീഴ്‌ത്തി വേൾഡ് ജയന്‍റ്സ്. വാശിയേറിയ ഫൈനൽ പോരാട്ടത്തിൽ 25 റണ്‍സിന്‍റെ തകർപ്പൻ വിജയത്തോടെയാണ് വേൾഡ് ജയന്‍റ്സ് കിരീടത്തിൽ മുത്തമിട്ടത്. വേൾഡ് ജയന്‍റ്സിന്‍റെ 257 റണ്‍സ് വിജയലക്ഷ്യം പിന്തുടർന്നിറങ്ങിയ ഏഷ്യ ലയണ്‍സിന് ഏട്ട് വിക്കറ്റ് നഷ്‌ടത്തിൽ 231 റണ്‍സ് എടുക്കാനേ സാധിച്ചുള്ളു. വെടിക്കെട്ട് ബാറ്റിങ്ങുമായി തിളങ്ങിയ കോറി ആൻഡേഴ്‌സനാണ് (43 പന്തിൽ 94) വേൾഡ് ജയന്‍റ്സിന്‍റെ വിജയത്തിന് ചുക്കാൻ പിടിച്ചത്.
ടോസ് നഷ്‌ടപ്പെട്ട് ബാറ്റിങ്ങിനിറങ്ങിയ വേൾഡ് ജയന്‍റ്സ് അഞ്ച് വിക്കറ്റ് നഷ്‌ടത്തിൽ 256 റണ്‍സ് എടുത്തു. കോറി ആൻഡേഴ്‌സനെക്കൂടാതെ കെവിൻ പീറ്റേഴ്‌സണ്‍(48), ബ്രാഡ് ഹാഡിൽ(37), ഡാരൻ സമി(38) എന്നിവരും മികച്ച രീതിയിൽ ബാറ്റ് വീശി. ഏഷ്യ ലയൻസിനായി നുവാൻ കുലശേഖര മൂന്ന് വിക്കറ്റ് വീഴ്‌ത്തിയപ്പോൾ ചാമിന്ദ വാസ്, മുത്തയ്യ മുരളീധരൻ എന്നിവർ ഓരോ വിക്കറ്റ് വീതം വീഴ്‌ത്തി.