സെന്‍റ് കീറ്റ്‌സ് : മൂന്നാം ടി20-യില്‍ ഇന്ത്യയ്‌ക്കെതിരെ ടോസ് നഷ്‌ടപ്പെട്ട് ആദ്യം ബാറ്റിങ്ങിനിറങ്ങിയ വെസ്‌റ്റിന്‍ഡീസിന് ഭേദപ്പെട്ട തുടക്കം. ആദ്യ പത്തോവറില്‍ ഒരു വിക്കറ്റ് നഷ്‌ടത്തില്‍ 65 റണ്‍സാണ് വിന്‍ഡീസ് നേടിയത്. 20 പന്തില്‍ 20 റണ്‍സെടുത്ത ബ്രാണ്ടന്‍ കിങ്ങിനെ ഹാര്‍ദിക് പാണ്ഡ്യയാണ് പുറത്താക്കിയത്.
പവര്‍പ്ലേയില്‍ ഓപ്പണര്‍മാരായ കൈല്‍ മേയേഴ്‌സ്, ബ്രാണ്ടന്‍ കിങ് എന്നിവര്‍ ചേര്‍ന്ന് 45 റണ്‍സാണ് വിന്‍ഡീനായി നേടിയത്. ഏട്ടാം ഓവറിലാണ് ഹാര്‍ദിക് ആദ്യ വിക്കറ്റ് സ്വന്തമാക്കിയത്. ഇന്നലെ നടന്ന രണ്ടാം മത്സരം വിജയിച്ചതിന്‍റെ ആത്മവിശ്വാസത്തിലാണ് വാര്‍ണര്‍ പാര്‍ക്കില്‍ ആതിഥേയര്‍ ബാറ്റ് ചെയ്യുന്നത്.
അതേസമയം നിര്‍ണായകമായ മൂന്നാം ടി20യില്‍ ഒരു മാറ്റവുമായാണ് ഇന്ത്യ കളത്തിലിറങ്ങിയത്. ഓള്‍റൗണ്ടര്‍ രവീന്ദ്ര ജഡേജയ്‌ക്ക് പകരം ദീപക് ഹൂഡയാണ് അന്തിമ ഇലവനില്‍ ഇടം നേടിയത്. സഞ്‌ജു സാംസണിന് ഇന്നും അവസാന പതിനൊന്നില്‍ ഇടം നേടാന്‍ കഴിഞ്ഞില്ല.