ലണ്ടന്‍ : മുന്‍ ഇന്ത്യന്‍ നായകന്‍ വിരാട് കോലി കൊവിഡ് ബാധിതനായിരുന്നതായി റിപ്പോര്‍ട്ട്. ദക്ഷിണാഫ്രിക്കയ്‌ക്കെതിരായ ടി20 പരമ്പരയില്‍ കോലിക്ക് വിശ്രമമനുവദിച്ചിരുന്നു. ഈ ഇടവേളയിൽ കുടുംബത്തോടൊപ്പം മാലിദ്വീപിൽ പോയി മടങ്ങിയതിന് പിന്നാലെ കോലി കൊവിഡ് പോസിറ്റീവായിരുന്നുവെന്നാണ് റിപ്പോർട്ടുകൾ. പിന്നീട് താരം കൊവിഡിൽ നിന്ന് മുക്‌തനായി. ബിസിസിഐ വൃത്തങ്ങളെ ഉദ്ധരിച്ച് കൊണ്ട് ടൈംസ് ഓഫ് ഇന്ത്യ റിപ്പോർട്ട് ചെയ്‌തത്.
നിലവില്‍ ഇംഗ്ലണ്ടില്‍ ഇന്ത്യന്‍ ടീമിനൊപ്പം പരിശീലനം നടത്തുന്നുണ്ട് കോലി. കഴിഞ്ഞ ആഴ്‌ചയാണ് കോലി ഇംഗ്ലണ്ടിലെത്തിയത്. പരിശീലകൻ രാഹുല്‍ ദ്രാവിഡിനൊപ്പം നില്‍ക്കുന്ന ചിത്രമെല്ലാം കോലി പങ്കുവച്ചിരുന്നു. അതേസമയം, ഇന്ത്യന്‍ താരങ്ങള്‍ കൊവിഡ് പോസിറ്റീവാകുന്നത് ഇന്ത്യന്‍ ക്യമ്പിന് തലവേദനയുണ്ടാക്കുന്നുണ്ട്. നേരത്തെ ആര്‍ അശ്വിന് കൊവിഡ് പോസിറ്റീവായത് കാരണം ഇംഗ്ലണ്ടിലേക്ക് യാത്ര തിരിക്കാൻ ആയിരുന്നില്ല.