ദുബായ്‌ :ഏഷ്യ കപ്പിൽ ഹോങ്കോങ്ങിനെതിരായ മത്സരത്തിലെ അർധ സെഞ്ച്വറിയിലൂടെ പുത്തൻ റെക്കോഡ് കുറിച്ച് വിരാട് കോലി. മത്സരത്തിൽ 44 പന്തിൽ 59 റണ്‍സാണ് താരം സ്വന്തമാക്കിയത്. ഇതോടെ ടി20 ക്രിക്കറ്റിൽ ഏറ്റവുമധികം അർധ സെഞ്ച്വറി നേടിയ താരം എന്ന നേട്ടത്തിൽ ഇന്ത്യൻ നായകൻ രോഹിത് ശർമയ്‌ക്കൊപ്പം എത്തിയിരിക്കുകയാണ് ഇന്ത്യൻ റണ്‍ മെഷീൻ.
ഇരുവർക്കും ടി20 ക്രിക്കറ്റിൽ 31 അർധ സെഞ്ച്വറികൾ വീതമാണുള്ളത്. 126 ഇന്നിങ്സുകളിൽ നിന്നാണ് രോഹിത് ശർമയുടെ ഈ നേട്ടം. എന്നാൽ വെറും 93 ഇന്നിങ്സുകളിൽ നിന്നാണ് കോലി രോഹിത്തിനൊപ്പമെത്തിയത്. പാകിസ്ഥാൻ നായകൻ ബാബർ അസമാണ് ഇരുവർക്കും പിന്നിൽ മൂന്നാം സ്ഥാനത്ത്. 70 ഇന്നിങ്സുകളിൽ നിന്ന് 27 അർധ സെഞ്ച്വറികൾ അസം നേടിയിട്ടുണ്ട്.