ഹൈദരാബാദ്: ഇന്ത്യൻ ക്രിക്കറ്റ് താരം റിഷഭ് പന്തും ബോളിവുഡ് താരം ഉർവശി റൗട്ടേലയും തമ്മിൽ സോഷ്യൽ മീഡിയയിലൂടെയുള്ള വാക്‌പോര് ആരാധകരും, ട്രോളൻമാരും ആഘോഷമാക്കാറുണ്ട്. ഇപ്പോൾ ഒരു ചെറിയ ഇടവേളയ്‌ക്ക് ശേഷം വീണ്ടും ട്രോളൻമാർക്ക് ആഘോഷിക്കാനുള്ള വകയുമായി എത്തിയിരിക്കുകയാണ് ഉർവശി. ഓസ്‌ട്രേലിയയിലേക്ക് പോകുന്നു എന്നറിയിച്ചുകൊണ്ട് ഉർവശി ഇൻസ്റ്റഗ്രാമിൽ പങ്കുവച്ച ചിത്രമാണ് ഇപ്പോൾ സമൂഹ മാധ്യമങ്ങളില്‍ വൈറലായിരിക്കുന്നത്.
നിലവിൽ ടി20 ലോകകപ്പിനായി ഓസ്‌ട്രേലിയയിലാണ് റിഷഭ് പന്ത്. ഇതിനിടെയാണ് താൻ ഓസ്‌ട്രേലിയയിലേക്ക് പോകുന്നു എന്നറിയിച്ചുകൊണ്ട് ഉർവശി വിമാനത്തിലിരിക്കുന്ന ചിത്രങ്ങൾ ഇൻസ്റ്റഗ്രാമിൽ പോസ്റ്റ് ചെയ്‌തത്. ചിത്രങ്ങൾക്ക് താഴെ 'അതിനിടെ, ഓസ്‌ട്രേലിയയിൽ സാഹസികതകൾ ആരംഭിക്കുന്നു', 'എന്‍റെ ലൗവിനെ പിന്തുടരുന്നു, അത് എന്ന ഓസ്‌ട്രേലിയയിലേക്ക് നയിച്ചു' എന്നിങ്ങനെയുള്ള രണ്ട് ക്യാപ്‌ഷനുകളും ഉർവശി കുറിച്ചിട്ടുണ്ട്.
ഇതോടെ ചിത്രങ്ങൾ നെറ്റിസണ്‍സ് ഏറ്റെടുക്കുകയായിരുന്നു. ഇതിന് പിന്നാലെ ട്വിറ്ററിൽ നിരവധി മീമുകളും, ട്രോളുകളും പിറന്നു. ഉർവശിയുടെ ഓസ്‌ട്രേലിയ സന്ദർശനം പന്തിനെ കാണാനാണോ എന്നാണ് പലരും ചോദിച്ചത്. 'റിഷഭ് പന്ത് നിങ്ങൾക്കായി കാത്തിരിക്കുന്നു. എത്രയും പെട്ടന്ന് അവിടേക്ക് ചെല്ലുക' എന്ന് കമന്‍റുകളിട്ടും ചിലർ താരത്തെ കളിയാക്കി.
2018-ൽ ഇരുവരെയും ഒരുമിച്ച് പാർട്ടികളിലും റെസ്റ്റോറന്‍റുകളിലും കണ്ടുതുടങ്ങിയതോടെയാണ് താരങ്ങൾ തമ്മിൽ പ്രണയത്തിലാണെന്ന തരത്തിൽ വാർത്തകൾ പ്രചരിച്ചത്. അതേവർഷം തന്നെ ഇരുവരും വാട്‌സ്‌ആപ്പിൽ പരസ്‌പരം ബ്ലോക്ക് ചെയ്‌തു എന്ന തരത്തിലും വാർത്തകൾ വന്നു. പിന്നാലെ 2019ൽ പന്ത് വാർത്തകൾ നിഷേധിക്കുകയും ഇഷ നേഗിയുമായി പ്രണയത്തിലാണെന്ന് അറിയിക്കുകയും ചെയ്‌തു.