മെൽബൺ: ടി20 ലോകകപ്പില്‍ ഇംഗ്ലണ്ടും പാകിസ്ഥാനും തമ്മിലുള്ള കലാശപ്പോരിനായി കാത്തിരിക്കുകയാണ് ക്രിക്കറ്റ് ലോകം. മെല്‍ബണ്‍ ക്രിക്കറ്റ് ഗ്രൗണ്ടില്‍ ഞായറാഴ്‌ച ഉച്ചയ്‌ക്ക് 1.30നാണ് മത്സരം നടക്കുക. എന്നാല്‍ മത്സരം മഴ ഭീഷണി നേരിടുന്നത് ആരാധകരെ നിരാശരാക്കുകയാണ്.
മെല്‍ബണില്‍ ഞായറാഴ്‌ച 95 ശതമാനമാണ് മഴയ്‌ക്ക് സാധ്യതയുള്ളത്. എട്ട് മുതൽ 20 മില്ലിമീറ്റർ വരെയാണ് മഴ പ്രതീക്ഷിക്കപ്പെടുന്നത്. മത്സരത്തിന് റിസര്‍വ് ദിനമുണ്ടെങ്കിലും കാലാവസ്ഥ പ്രവചനം ആശാവഹമല്ല.
റിസർവ് ദിനമായ തിങ്കളാഴ്‌ച (നവംബർ 14) 95 ശതമാനം മഴ പെയ്യാനുള്ള സാധ്യതയാണുള്ളത്. നേരത്തെ ഗ്രൂപ്പ് ഘട്ടത്തില്‍ മഴ രസംകൊല്ലിയായെത്തിയിരുന്നു. ഇതേത്തുടര്‍ന്ന് ഒരു പന്ത് പോലും എറിയാതെ ചില മത്സരങ്ങൾ റദ്ദാക്കുകയും ചെയ്‌തു.
ഞായറാഴ്‌ചയും റിസര്‍വ് ദിനമായ തിങ്കളാഴ്‌ചയും മത്സരം നടന്നില്ലെങ്കില്‍ ഇരു ടീമുകളും കിരീടം പങ്കിടാന്‍ നിര്‍ബന്ധിതരാവും. ഇതോടെ ആവേശകരമായ ഒരു ടൂര്‍ണമെന്‍റിന്‍റെ അവസാനം നിറം മങ്ങിയതാവും. അതേസമയം ടൂര്‍ണമെന്‍റില്‍ തങ്ങളുടെ രണ്ടാം കിരീടമാണ് ഇംഗ്ലണ്ടും പാകിസ്ഥാനും ലക്ഷ്യം വയ്‌ക്കുന്നത്.
ഇരു സംഘത്തിന്‍റേയും മൂന്നാം ഫൈനല്‍ കൂടിയാണിത്. ടൂര്‍ണമെന്‍റില്‍ പുറത്താവലിന്‍റെ വക്കില്‍ നിന്നും തിരിച്ചെത്തിയ പാകിസ്ഥാന്‍ ആദ്യ സെമിയില്‍ ന്യൂസിലന്‍ഡിനെ തോല്‍പ്പിച്ചാണ് ഫൈനലുറപ്പിച്ചത്. രണ്ടാം സെമിയില്‍ ഇന്ത്യയെ തോല്‍പ്പിച്ചാണ് ഇംഗ്ലണ്ടിന്‍റെ മുന്നേറ്റം.
Also read: 'ഹൃദയങ്ങളിൽ നിരാശയോടെ, സ്വപ്‌നം സാക്ഷാത്കരിക്കാനാവാതെ മടക്കം'; ഇന്ത്യയുടെ പുറത്താവലില്‍ പ്രതികരിച്ച് വിരാട് കോലി
