ദുബായ്: ടി20 ലോകകപ്പിന് മുന്നോടിയായുള്ള രണ്ടാം സന്നാഹ മത്സരത്തിലും ഇന്ത്യയ്‌ക്ക് തകര്‍പ്പന്‍ വിജയം. ഇന്ന് നടന്ന മത്സരത്തില്‍ ഓസ്‌ട്രേലിയയെ ഒമ്പത് വിക്കറ്റുകള്‍ക്കാണ് ഇന്ത്യ തോല്‍പ്പിച്ചത്. ടോസ് നേടി ആദ്യം ബാറ്റ് ചെയ്‌ത ഓസീസ് നിശ്ചത 20 ഓവറില്‍ അഞ്ച് വിക്കറ്റ് നഷടത്തില്‍ ഉയര്‍ത്തിയ 153 റണ്‍സ് വിജയ ലക്ഷ്യം 13 പന്തുകള്‍ ബാക്കി നില്‍ക്കെയാണ് ഇന്ത്യ അടിച്ചെടുത്തത്. സ്കോര്‍: ഓസ്ട്രേലിയ- 152/5 (20), ഇന്ത്യ- 153/1(17.5).
41 പന്തില്‍ 60 റണ്‍സെടുത്ത രോഹിത് ശര്‍മയുടെ പ്രകടനമാണ് ഇന്ത്യന്‍ വിജയം എളുപ്പമാക്കിയത്. അടുത്ത ബാറ്റർക്കായി താരം വഴിമാറിക്കൊടുക്കുകയായിരുന്നു. കെല്‍ രാഹുല്‍ 31 പന്തില്‍ 39 റണ്‍സെടുത്ത് പുറത്തായി. 27 പന്തില്‍ 38 റണ്‍സെടുത്ത സൂര്യകുമാര്‍ യാദവും 8 പന്തില്‍ 14 റണ്‍സെടുത്ത ഹര്‍ദിക് പാണ്ഡ്യയും പുറത്താവാതെ നിന്നു.
ഓസീസിനായി രണ്ട് ഓവറില്‍ 14 റണ്‍സ് വഴങ്ങിയ ആഷ്ടൺ ആഗർ ഒരു വിക്കറ്റ് വീഴ്ത്തി. നാല് ഓവറില്‍ 33 റണ്‍സ് വഴങ്ങിയ പാറ്റ് കമ്മിന്‍സ് നിറം മങ്ങി.