അഹമ്മദാബാദ്: ഇംഗ്ലണ്ടിനെതിരായ ട്വന്‍റി 20 പരമ്പരയിലെ നാലാം മത്സരത്തിൽ ഇന്ത്യക്ക് എട്ട് റൺസിന്‍റെ ജയം. ഇതോടെ പരമ്പരയില്‍ 2-2ന് ഇന്ത്യ ഒപ്പമെത്തി. അരങ്ങേറ്റത്തില്‍ അര്‍ധ സെഞ്ചുറി നേടിയ സൂര്യകുമാര്‍ യാദവാണ് മാൻ ഓഫ് ദി മാച്ച്.
ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഇന്ത്യ 185 റണ്‍സ് ആണ് നേടിയത്. മറുപടി ബാറ്റിങ്ങിന് ഇറങ്ങിയ ഇംഗ്ലണ്ടിന് 23 പന്തില്‍ നിന്ന് 46 റണ്‍സുമായി ബെന്‍ സ്റ്റോക്ക്‌സ് വിജയ പ്രതീക്ഷ നല്‍കി. എന്നാൽ ബെന്‍ സ്‌റ്റോക്ക്‌സിനേയും മോര്‍ഗനേയും തുടരെയുള്ള പന്തുകളില്‍ മടക്കി ശര്‍ദുല്‍ താക്കൂറാണ് കളി ഇന്ത്യക്ക് അനുകൂലമായി തിരിച്ചത്. അവസാന ഓവറില്‍ ജയിക്കാൻ 23 റണ്‍സ് വേണ്ട ഇംഗ്ലണ്ടിന് 14 റണ്‍സ് മാത്രമാണ് നേടാനായത്. ഹർദിക് പാണ്ഡ്യ, രാഹുല്‍ ചഹർ എന്നിവർ രണ്ട് വിക്കറ്റ് വീതവും, ശര്‍ദുല്‍ താക്കൂർ മൂന്ന് വിക്കറ്റും, ഭുവനേശ്വര്‍ കുമാര്‍ ഒരു വിക്കറ്റും വീഴ്ത്തി.