ഹൈദരാബാദ് : രാജ്യാന്തര ക്രിക്കറ്റില്‍ നിന്ന് വിരമിച്ചെങ്കിലും ഏറെ ആരാധക സമ്പത്തുള്ള താരമാണ് മുന്‍ ഇന്ത്യന്‍ താരം സുരേഷ് റെയ്ന. നിലവില്‍ യുഎഇയില്‍ നടക്കാനിരിക്കുന്ന ഐപിഎല്ലിന്‍റെ ഒരുക്കത്തിലാണ് താരം.
ഇപ്പോഴിതാ ഇന്ത്യയുടെ മുന്‍ നായകന്‍മാരായ എംഎസ് ധോണി, മുഹമ്മദ് അസ്ഹറുദ്ദീൻ എന്നിവരെപ്പോലെ തന്‍റെ ജീവിതവും സിനിമയാവുകയാണെങ്കില്‍ നായകനാവേണ്ടത് ആരാണെന്ന് തുറന്നുപറഞ്ഞിരിക്കുയാണ് റെയ്ന.
കഴിഞ്ഞ ദിവസം ഇൻസ്റ്റഗ്രാം ലൈവിൽ സംസാരിക്കുമ്പോഴാണ് റെയ്ന തന്‍റെ ആഗ്രഹം വെളിപ്പെടുത്തിയത്. തെന്നിന്ത്യന്‍ താരങ്ങളായ ദുൽഖർ സൽമാനോ, സൂര്യയോ ആവണം തന്‍റെ ബയോപിക്കില്‍ നായകനാവേണ്ടതെന്നാണ് റെയ്ന പറയുന്നത്. തന്‍റെ വികാരം ഉള്‍ക്കൊള്ളാനാവും എന്നതാണ് ഇരുവരുടേയും പേര് നിര്‍ദേശിക്കാന്‍ കാരണമെന്നും താരം വ്യക്തമാക്കി.