മുംബൈ:ബിസിസിഐ പ്രസിഡന്‍റായി ചുമതലയേറ്റെടുത്ത റോജര്‍ ബിന്നിയ്‌ക്ക് ആശംസയുമായി മുന്‍ അധ്യക്ഷന്‍ സൗരവ് ഗാംഗുലി. പുതിയ ഭാരവാഹികള്‍ക്ക് നല്ല രീതിയില്‍ പ്രവര്‍ത്തിക്കാന്‍ സാധിക്കും. മികച്ച കരങ്ങളിലാണ് ബിസിസിഐ എത്തിയിരിക്കുന്നതെന്നും ഗാംഗുലി അഭിപ്രായപ്പെട്ടു.
'റോജര്‍ ബിന്നിക്ക് എല്ലാ ആശംസകളും നേരുന്നു. പുതിയ സംഘം ബോര്‍ഡിനെ നല്ലരീതിയില്‍ മുന്നോട്ട് കൊണ്ടുപോകും. ഇന്ത്യൻ ക്രിക്കറ്റ് ശക്തമാണ്, അതുകൊണ്ട് തന്നെ പുതിയ ഭാരവാഹികള്‍ക്ക് എല്ലാ ആശംസകളും നേരുന്നു', ഗാംഗുലി പറഞ്ഞു.
സൗരവ് ഗാംഗുലിക്ക് പകരക്കാരനായാണ് റോജര്‍ ബിന്നിയെ ബിസിസിഐ അധ്യക്ഷ സ്ഥാനത്തേക്ക് തെരഞ്ഞെടുത്തത്. ഒക്‌ടോബര്‍ 11ന് നടന്ന ബിസിസിഐ യോഗത്തിന് പിന്നാലെയായിരുന്നു ഗാംഗുലിയെ മാറ്റിനിര്‍ത്താനുള്ള നടപടി സ്വീകരിച്ചത്. തുടര്‍ന്ന് റോജര്‍ ബിന്നി മാത്രമാണ് അധ്യക്ഷ സ്ഥാനത്തേക്ക് നാമനിര്‍ദേശം സമര്‍പ്പിച്ചത്.