മെല്‍ബണ്‍: ദീര്‍ഘകാലമായി കാല്‍മുട്ടിനെ അലട്ടിയിരുന്ന വേദനയകറ്റാൻ ശസ്‌ത്രക്രിയയ്‌ക്ക് വിധേയനായി മുന്‍ പാകിസ്ഥാന്‍ ക്രിക്കറ്റ് താരം ഷൊയ്‌ബ് അക്തര്‍. ഓസ്‌ട്രേലിയിലെ മെൽബണിലെ ആശുപത്രിയിലാണ് താരം ശസ്‌ത്രക്രിയ പൂര്‍ത്തിയാക്കിയത്. ശസ്‌ത്രക്രിയ വിജയകരമായി പൂര്‍ത്തിയാക്കിയെന്നും എല്ലാവരും തന്‍റെ ആരോഗ്യത്തിനുവേണ്ടി പ്രാര്‍ത്ഥിക്കണമെന്ന അഭ്യര്‍ത്ഥനയുമായി താരം വീഡിയോ പുറത്ത് വിട്ടിരുന്നു.
'എനിക്ക് നാലോ അഞ്ചോ വര്‍ഷം കൂടി ക്രിക്കറ്റ് കളിക്കാന്‍ സാധിക്കുമായിരുന്നു. അങ്ങനെ ചെയ്‌തിരുന്നെങ്കില്‍ ഞാനിപ്പോള്‍ ഒന്നെഴുന്നേല്‍ക്കാന്‍ പോലുമാകാതെ വീല്‍ചെയറിലായിപ്പോയേനേ. അതുകൊണ്ടാണ് ഞാൻ ക്രിക്കറ്റില്‍ നിന്ന് നേരത്തെ വിരമിച്ചത്. എനിക്ക് ഇപ്പോള്‍ നല്ല വേദനയുണ്ട്. ഇതെന്‍റെ അവസാന ശസ്‌ത്രക്രിയയാകുമെന്ന് കരുതുന്നു. നിങ്ങളുടെ പ്രാര്‍ഥന കൂടെയുണ്ടാവണം' -വീഡിയോയിലൂടെ അക്തര്‍ പറഞ്ഞു.