ടി20 ലോകകപ്പ് : അഫ്രീദിയെ കടത്തിവെട്ടി ഷാക്കിബ് അൽ ഹസൻ, വിക്കറ്റ് വേട്ടക്കാരിൽ മുന്നിൽ

ടി20 ലോകകപ്പിൽ 39 വിക്കറ്റുള്ള ഷാഹിദ് അഫ്രീദിയെയാണ് വെറും 29 മത്സരങ്ങളിൽ നിന്ന് 41 വിക്കറ്റുമായി ഷാക്കിബ് മറികടന്നത്.

ഷാർജ :ടി20 ലോകകപ്പിൽ ഏറ്റവുമധികം വിക്കറ്റ് നേടുന്ന താരമെന്ന റെക്കോഡ് സ്വന്തമാക്കി ബംഗ്ലാദേശിന്‍റെ സൂപ്പർ ഓൾറൗണ്ടർ ഷാക്കിബ് അൽ ഹസൻ. ശ്രീലങ്കക്കെതിരായ മത്സരത്തിൽ രണ്ട് വിക്കറ്റ് നേടിയാണ് പാകിസ്ഥാൻ താരം ഷാഹിദ് അഫ്രീദിയുടെ പേരിലുള്ള റെക്കോഡ് ഷാക്കിബ് തിരുത്തിക്കുറിച്ചത്.

ടി20 ലോകകപ്പിൽ 39 വിക്കറ്റുള്ള ഷാഹിദ് അഫ്രീദിയെ വെറും 29 മത്സരങ്ങളിൽ നിന്നാണ് 41 വിക്കറ്റുമായി ഷാക്കിബ് മറികടന്നത്. 38 വിക്കറ്റുകളുള്ള ശ്രീലങ്കയുടെ ലസിത് മലിംഗയാണ് ഈ പട്ടികയിൽ മൂന്നാം സ്ഥാനത്ത്.

ലോകകപ്പ് മാറ്റി നിർത്തിയാലും ടി20യിൽ ഏറ്റവുമധികം വിക്കറ്റുള്ള താരവും ഷാക്കിബ് തന്നെയാണ്. 92 മത്സരങ്ങളിൽ നിന്ന് 117 വിക്കറ്റുകളാണ് താരം ഇതുവരെ സ്വന്തമാക്കിയിട്ടുള്ളത്. ഈ പട്ടികയിൽ 107 വിക്കറ്റുള്ള മലിംഗ രണ്ടാം സ്ഥാനത്തും 99 വിക്കറ്റുകൾ വീതമുള്ള ടിം സൗത്തിയും, ഷാഹിദ് അഫ്രീദിയും മൂന്നാം സ്ഥാനത്തുമാണ്.