മുംബൈ: ശ്രീലങ്കയ്‌ക്കെതിരായ ടി20 പരമ്പരയിലെ ശേഷിക്കുന്ന മത്സരങ്ങളില്‍ നിന്നും ഇന്ത്യന്‍ വിക്കറ്റ് കീപ്പര്‍ ബാറ്റര്‍ സഞ്‌ജു സാംസണ് പുറത്ത്. കാല്‍മുട്ടിനേറ്റ പരിക്കാണ് മലായാളി താരത്തിന് തിരിച്ചടിയായത്. സഞ്ജുവിന്റെ പകരക്കാരനായി ജിതേഷ് ശര്‍മ്മയെ ടീമില്‍ ഉള്‍പ്പെടുത്തി.
വാങ്കഡേയില്‍ നടന്ന ആദ്യ മത്സരത്തില്‍ ബൗണ്ടറി തടഞ്ഞിടാനുള്ള ശ്രമത്തിനിടെയാണ് സഞ്‌ജുവിന് പരിക്കേറ്റത്. ബൗണ്ടറി റോപ്പിനടുത്ത് നിന്ന് ഡൈവ് ചെയ്‌ത സഞ്ജുവിന്റെ ഇടത് കാല്‍മുട്ട് നിലത്തിടിക്കുകയായിരുന്നു. തുടര്‍ന്ന് സ്‌കാനിങിന് ഉള്‍പ്പടെ വിധേയനാക്കിയ ശേഷമാണ് വിക്കറ്റ് കീപ്പര്‍ ബാറ്റര്‍ക്ക് രണ്ടാം മത്സരത്തിന് മുന്‍പായി വിശ്രമം അനുവദിച്ചത്.