ഹൈദരാബാദ് : മലയാളികളുടെ സ്വന്തം സഞ്ജു സാംസണിന്‍റെ ഇന്ത്യൻ ടീമിലേക്കുള്ള തിരിച്ചുവരവ് ആഘോഷമാക്കി ആരാധകർ. വെസ്റ്റ് ഇൻഡീസിനെതിരെയുള്ള ഏകദിന പരമ്പരയ്ക്കുള്ള ടീമിലാണ് വിക്കറ്റ് കീപ്പർ ബാറ്ററായി സഞ്ജു സ്ഥാനം പിടിച്ചത്. ഇതിന് പിന്നാലെ ഇന്ത്യൻ ക്രിക്കറ്റ് ടീമിന്‍റെ ഔദ്യോഗിക ഫേസ്‌ബുക്കിൽ പരമ്പരയ്ക്കുള്ള താരങ്ങളുടെ ചിത്രങ്ങൾ പങ്കുവച്ചിരുന്നു.
ഇതിൽ മറ്റുതാരങ്ങളുടെ ചിത്രങ്ങളെ അപേക്ഷിച്ച് സഞ്ജുവിന്‍റെ ഫോട്ടോയ്‌ക്കാണ് കൂടുതൽ ആരാധക പിന്തുണ ലഭിച്ചുകൊണ്ടിരിക്കുന്നത്. സീനിയർ താരങ്ങളായ ദിനേശ് കാർത്തിക്, ഭുവനേശ്വർ കുമാർ എന്നീ താരങ്ങളുടെ ചിത്രങ്ങളെയെല്ലാം ബഹുദൂരം പിന്നിലാക്കിയാണ് സഞ്ജുവിന്‍റെ ചിത്രം കുതിക്കുന്നത്. നിലവിൽ 47000 ത്തിലധികം ലൈക്കും, 5000 ത്തിലധികം കമന്‍റുകളുമാണ് ഫോട്ടോയ്ക്ക് ലഭിച്ചിരിക്കുന്നത്.
കൂട്ടത്തിൽ യുവ പേസ് സെൻസേഷൻ ഉമ്രാൻ മാലിക്കിന്‍റെ ചിത്രമാണ് ആരാധക പിന്തുണയിൽ രണ്ടാമത്. 15000ത്തിലധികം ലൈക്കുകളാണ് ലഭിച്ചിട്ടുള്ളത്. മൂന്നാമതുള്ള ദിനേശ് കാർത്തിക്കിന്‍റെ ചിത്രത്തിന് 8000ത്തിലധികം ലൈക്കുകളാണ് കിട്ടിയത്.
സഞ്ജുവിന്‍റെ ചിത്രത്തിന് ലഭിക്കുന്ന പിന്തുണ താരത്തിന്‍റെ പ്രതിഭയ്‌ക്ക് ലഭിക്കുന്ന അംഗീകാരമാണ്. സഞ്ജുവിന് സ്ഥിരമായി ഇന്ത്യൻ ടീമിൽ സ്ഥാനം നൽകിയാൽ താരത്തിന് പൂർണ മികവിലെത്താനാകുമെന്നാണ് പോസ്റ്റിന് താഴെ വരുന്ന കമന്‍റുകളിൽ ഭൂരിഭാഗവും. താരത്തിന്‍റെ ടീമിലേക്കുള്ള തിരിച്ചുവരവിന് ആശംസകളുമായും ആരാധകർ എത്തിയിട്ടുണ്ട്.