തിരുവനന്തപുരം : മലയാളികളുടെ അഭിമാനമായ ഇന്ത്യന്‍ ക്രിക്കറ്റ് താരം സഞ്ജു സാംസണിന് ഇന്ന് 28-ാം പിറന്നാള്‍. ഏറെ തഴയപ്പെട്ടുവെങ്കിലും ദേശീയ ടീമിലേയ്ക്ക് തിരികെയെത്താന്‍ കഴിഞ്ഞുവെന്നത് സഞ്ജുവിന്റെ പ്രതിഭ തെളിയിക്കുന്നതാണ്. 2015ല്‍ സിംബാബ്‌വെയ്‌ക്കെതിരെ ടി20 യില്‍ അരങ്ങേറ്റം നടത്തിയ സഞ്‌ജുവിന് ടീമില്‍ വീണ്ടും അവസരം ലഭിക്കാന്‍ കാത്തിരിക്കേണ്ടി വന്നത് നീണ്ട അഞ്ച് വര്‍ഷമാണ്.
തുടര്‍ന്ന് 2020 ജനുവരിയില്‍ നടന്ന ശ്രീലങ്കന്‍ പര്യടനത്തിലാണ് സഞ്ജു സാംസണ് കരിയറിന്‍റെ രണ്ടാം ഇന്നിങ്‌സ് ആരംഭിച്ചത്. മിന്നുന്ന പ്രകടനത്തോടെ ഇന്ന് ഇന്ത്യന്‍ ക്രിക്കറ്റില്‍ അവഗണിക്കാനാവാത്ത സാന്നിധ്യമായി സഞ്ജു മാറിക്കഴിഞ്ഞു. മലയാളി സൂപ്പര്‍ താരത്തിന് പിറന്നാള്‍ ആശംസകള്‍ നേര്‍ന്ന് നിരവധി പ്രമുഖരുള്‍പ്പടെയുള്ള ആരാധകര്‍ രംഗത്തെത്തിയിട്ടുണ്ട്.
'സഞ്ജു യുവ തലമുറയ്ക്ക് പ്രചോദനമാണ്' എന്നാണ് ഇന്ത്യയുടെ മുന്‍ താരം സുരേഷ് റെയ്‌ന ട്വിറ്ററില്‍ കുറിച്ചത്. ബിസിസിഐ, ഐപിഎല്ലില്‍ സഞ്ജുവിന്റെ ടീമായ രാജസ്ഥാന്‍ റോയല്‍സ്, കൊല്‍ക്കത്ത നൈറ്റ്‌റൈഡേഴ്‌സ് തുടങ്ങിയവരും സഞ്‌ജുവിന് പിറന്നാള്‍ ആശംസകള്‍ നേര്‍ന്നു.