മുംബൈ: ക്രിക്കറ്റില്‍ നിന്നും വിരമിച്ച മലയാളി പേസര്‍ എസ് ശ്രീശാന്തിന് ആശംസകളുമായി ഇതിഹാസ താരം സച്ചിന്‍ ടെണ്ടുല്‍ക്കര്‍. എപ്പോഴും പ്രതിഭാശാലിയായ ബൗളറായാണ് ശ്രീശാന്തിനെ കണ്ടതെന്ന് സച്ചിന്‍ ഇന്‍സ്റ്റാഗ്രാമിൽ കുറിച്ചു.
'ദീര്‍ഘനാള്‍ ഇന്ത്യയെ പ്രതിനിധീകരിച്ചതിൽ അഭിനന്ദനങ്ങള്‍. രണ്ടാം ഇന്നിങ്സിന് ആശംസകള്‍' കളിക്കളത്തിലെ ഇരുവരുടേയും പഴയകാല ചിത്രം പങ്കുവെച്ച് സച്ചിൻ കുറിച്ചു. 2011ലെ ഏകദിന ലോകകപ്പില്‍ കിരീടം നേടിയ ഇന്ത്യന്‍ ടീമിൽ ഇരുവരും അംഗങ്ങളായിരുന്നു.
അതേസമയം കഴിഞ്ഞ ബുധനാഴ്‌ചയാണ് ശ്രീശാന്ത് വിരമിക്കൽ പ്രഖ്യാപിച്ചത്. അടുത്ത തലമുറയിലെ ക്രിക്കറ്റ് താരങ്ങൾക്കായി ഫസ്റ്റ് ക്ലാസ് ക്രിക്കറ്റ് കരിയർ അവസാനിപ്പിക്കുകയാണെന്നാണ് താരം ട്വിറ്ററിലൂടെ അറിയിച്ചത്. എന്നാല്‍ ശ്രീശാന്തിന് ആശംസകള്‍ അറിയിച്ച് വളരെ കുറച്ച് താരങ്ങള്‍ മാത്രമാണ് രംഗത്തെത്തിയിരുന്നത്. ഇതേതുടര്‍ന്ന് മുതിര്‍ന്ന താരങ്ങള്‍ക്കെതിരെ വിമര്‍ശനം ഉയരുന്നതിനിടെയാണ് സച്ചിന്‍റെ ആശംസ.