ബെംഗളൂരു: ടി20 ലോകകപ്പിന് മുന്‍പുള്ള ഇന്ത്യയുടെ അവസാനത്തെ രാജ്യാന്തര ടി20 പരമ്പരയും അവസാനിച്ചിരിക്കുകയാണ്. ഇനി ഐപിഎല്ലിന് ശേഷം ഇന്ത്യയുടെ ടി20 ലോകകപ്പ് സ്ക്വാഡില്‍ ആരെല്ലാം ഇടം പിടിക്കുമെന്ന് അറിയുന്നതിനുള്ള കാത്തിരിപ്പിലാണ് ആരാധകര്‍. ആരൊക്കയാകും ഇന്ത്യയ്‌ക്ക് വേണ്ടി അമേരിക്കയിലും വെസ്റ്റ് ഇന്‍ഡീസിലുമായി നടക്കുന്ന ലോകകപ്പില്‍ കളിക്കുക എന്ന ചര്‍ച്ച ആരാധകര്‍ക്കിടയിലും തുടങ്ങിയിട്ടുണ്ട്.
അതിനിടെയാണ് ഇക്കാര്യത്തെ കുറിച്ച് ഇന്ത്യന്‍ നായകന്‍ രോഹിത് ശര്‍മ സംസാരിച്ചത് (Rohit Sharma About T20 World Cup Selection). ലോകകപ്പ് സ്ക്വാഡ് തെരഞ്ഞെടുപ്പ് സമയത്ത് തനിക്ക് എല്ലാവരേയും സന്തോഷിപ്പിക്കാന്‍ സാധിക്കില്ലെന്നാണ് രോഹിത് പറഞ്ഞത്. ബെംഗളൂരു ചിന്നസ്വാമി സ്റ്റേഡിയത്തില്‍ ഇന്ത്യ അഫ്‌ഗാനിസ്ഥാന്‍ മൂന്നാം ടി20 പൂര്‍ത്തിയായതിന് പിന്നാലെയായിരുന്നു രോഹിതിന്‍റെ പ്രതികരണം (Indian vs Afghanistan 3rd T20I).
'ലോകകപ്പിനുള്ള 15 അംഗ ടീമിലേക്ക് ആരെല്ലാം എത്തുമെന്ന കാര്യം ഇതുവരെയും ഞങ്ങള്‍ തീരുമാനിച്ചിട്ടില്ല. പക്ഷെ ടീമിലെത്തേണ്ട 8-10 താരങ്ങള്‍ ആരെല്ലാമെന്ന കാര്യം ഞങ്ങളുടെ മനസിലുണ്ട്. സാഹചര്യങ്ങള്‍ക്ക് അനുസരിച്ചായിരിക്കും ടീം കോമ്പിനേഷന്‍ അന്തിമമാക്കുക.
വിന്‍ഡീസിലെ സാഹചര്യങ്ങള്‍ മന്ദഗതിയില്‍ ഉള്ളതാണ്. അതിനെ അനുസരിച്ചാകും ടീം തെരഞ്ഞെടുപ്പ്. അതുകൊണ്ട് തന്നെ ഓരോ താരങ്ങളും മികച്ച പ്രകടനം നടത്തിയിട്ടും എന്തുകൊണ്ട് തെരഞ്ഞെടുക്കപ്പെട്ടു, തെരഞ്ഞെടുക്കപ്പെട്ടില്ല എന്ന കാര്യം അവരോട് വ്യക്തമായി തന്നെ പറയാനാണ് ഞങ്ങളുടെ ശ്രമം.