'ജവാന്‍'(Jawan Movie)ആവേശത്തിലാണ് ലോകമൊട്ടാകെയുള്ള ഷാരൂഖ് ഖാന്‍ (Shah Rukh Khan) ആരാധകര്‍. കഴിഞ്ഞ ദിവസം ചിത്രം ബിഗ്‌ സ്‌ക്രീനുകളില്‍ പ്രദര്‍ശനം തുടങ്ങിയത് മുതല്‍ അറ്റ്ലി (Atlee) ചിത്രത്തിലെ കിങ് ഖാന്‍റെ അഴിഞ്ഞാട്ടം കാണാന്‍ തിയേറ്ററുകളിലേക്ക് നിരവധി പേരാണ് ഒഴുകിയെത്തിക്കൊണ്ടിരിക്കുന്നത്. ഇക്കൂട്ടത്തില്‍ തന്നെ നിരവധി പ്രമുഖരും ഷാരൂഖ് ചിത്രം കണ്ട് ആസ്വദിക്കാനായി തിയേറ്ററുകളിലേക്ക് എത്തുന്നുണ്ട്.
ഇന്ത്യന്‍ ക്രിക്കറ്റ് താരം റിങ്കു സിങ്ങും റിലീസ് ദിനത്തില്‍ തന്നെ തന്‍റെ പ്രിയ താരത്തിന്‍റെ ഏറ്റവും പുതിയ ചിത്രം കാണാന്‍ തിയേറ്ററിലേക്ക് എത്തിയിരുന്നു (Rinku Singh Watched Jawan At Theater). തന്‍റെ ഇന്‍സ്റ്റഗ്രാം ഹാന്‍ഡിലുകളിലൂടെ പുറത്തുവിട്ട ഫോട്ടോകളിലൂടെയാണ് റിങ്കു ഇക്കാര്യം ആരാധകരെ അറിയിച്ചിരിക്കുന്നത്. ജവാന്‍ പോസ്റ്ററിനൊപ്പം താന്‍ നില്‍ക്കുന്നതും, ചിത്രം കാണുന്നതുമായ രണ്ട് ഫോട്ടോകളാണ് സോഷ്യല്‍ മീഡിയ പ്ലാറ്റ്‌ഫോം വഴി റിങ്കു പങ്കുവച്ചിരിക്കുന്നത്.
ഐപിഎല്‍ (IPL) ക്രിക്കറ്റില്‍ ഷാരൂഖ് ഖാന്‍ സഹ ഉടമയായ കൊല്‍ക്കത്ത നൈറ്റ് റൈഡേഴ്‌സ് (Kolkata Knight Riders) ടീം അംഗമാണ് റിങ്കു സിങ്. ഇക്കഴിഞ്ഞ ഐപിഎല്‍ സീസണിലെ മിന്നും പ്രകടനത്തിന് ഷാരൂഖ് റിങ്കുവിനെ അഭിനന്ദിച്ചിരുന്നു. ഗുജറാത്ത് ടൈറ്റന്‍സിനെതിരായ മത്സരത്തിലെ അവസാന ഓവറില്‍ അഞ്ച് സിക്‌സര്‍ പറത്തി കൊല്‍ക്കത്തയ്‌ക്ക് ത്രസിപ്പിക്കുന്ന ജയം സമ്മാനിക്കാന്‍ റിങ്കുവിന് സാധിച്ചിരുന്നു.