പിറന്ന്‌ വീണതിന് പിന്നാലെ മരണത്തിന് കീഴടങ്ങിയ മകളുടെ മരണത്തിനും തളർത്താനാവാതെ ബറോഡ ബാറ്റര്‍ വിഷ്ണു സോളങ്കി. മകളുടെ സംസ്കാരച്ചടങ്ങില്‍ പങ്കെടുത്ത് ദിവസങ്ങൾക്കുള്ളിൽ തന്നെ ഗ്രൗണ്ടിലേക്ക് തിരിച്ചെത്തിയ താരം സെഞ്ചുറി പ്രകടനം നടത്തിയാണ് ദുഃഖങ്ങളോട് പൊരുതിയത്. രഞ്ജി ട്രോഫിയില്‍ ചണ്ഡിഗഡിനെതിരായ മത്സരത്തിലാണ് വിഷ്ണുവിന്‍റെ പ്രകടനം. ഭുവനേശ്വറിലെ വികാഷ് ക്രിക്കറ്റ് ഗ്രൗണ്ടില്‍ നടക്കുന്ന മത്സരത്തില്‍ 165 പന്തുകളില്‍ 104 റൺസാണ് വിഷ്ണു സോളങ്കി കണ്ടെത്തിയത്. 12 ഫോറുകളോടെ അകമ്പടിയോടെയാണ് പ്രിയപ്പെട്ട മകള്‍ക്ക്, താരം ഹൃദയം കൊണ്ട് സ്‌മരണാഞ്ജലിയൊരുക്കിയത്.
ചണ്ഡിഗഡിന്‍റെ ഒന്നാം ഇന്നിങ്സ് സ്കോറായ 168 റൺസ് പിന്തുടര്‍ന്ന ബറോഡയ്ക്കായി അഞ്ചാം നമ്പറിലാണ് വിഷ്ണു കളത്തിലെത്തിയത്. താരത്തിന്‍റെ സെഞ്ചുറിക്കരുത്തില്‍ നിര്‍ണായകമായ ലീഡ് സ്വന്തമാക്കാനും ബറോഡയ്ക്കായി. ചണ്ഡിഗഡിനെതിരായ മത്സരത്തിനായി ഭുവനേശ്വറിലെത്തിയപ്പോഴാണ് മകളുടെ വിയോഗവാര്‍ത്ത വിഷ്ണു അറിയുന്നത്. ഇതോടെ സ്വന്തം നാടായ വഡോദരയിലേക്ക് തിരിച്ചുപോയ താരം സംസ്കാരച്ചടങ്ങുകളിൽ പങ്കെടുത്തു. തുടര്‍ന്ന് വെറും മൂന്ന് ദിവസത്തിനു ശേഷം ഭുവനേശ്വറിലേക്ക് തന്നെ തിരിച്ചെത്തുകയായിരുന്നു.