ഓക്ക്‌ലന്‍ഡ്: ന്യൂസിലന്‍ഡിനെതിരായ ഏകദിന പരമ്പരയിലെ ആദ്യ മത്സരത്തില്‍ ഇന്ത്യ ആദ്യം ബാറ്റ് ചെയ്യുന്നു. ടോസ് നേടിയ കിവീസ് നായകന്‍ കെയ്‌ന്‍ വില്യംസണ്‍ ഫീല്‍ഡിങ് തെരഞ്ഞെടുക്കുകയായിരുന്നു. അര്‍ഷ്‌ദീപ് സിങും, ഉമ്രാന്‍ മാലിക്കും ഏകദിന അരങ്ങേറ്റം നടത്തുന്ന മത്സരത്തില്‍ ഇന്ത്യയുടെ അന്തിമ ഇലവനില്‍ സഞ്‌ജു സാംസണും ഇടം നേടി.
വിക്കറ്റ് കീപ്പറായി വൈസ് ക്യാപ്‌റ്റന്‍ റിഷഭ് പന്ത് ടീമിലിടം നേടിയ സാഹചര്യത്തില്‍ ബാറ്ററായാണ് സഞ്‌ജു അവസാന പതിനൊന്നിലേക്കെത്തിയത്. പരമ്പരയില്‍ ആദ്യമായാണ് സഞ്‌ജുവിന് അവസരം ലഭിക്കുന്നത്. നേരത്തെ നടന്ന ടി20 മത്സരങ്ങളില്‍ താരത്തിന് അവസരം നല്‍കാത്തതിനെ വിമര്‍ശിച്ച് മുന്‍താരങ്ങള്‍ ഉള്‍പ്പടെയുള്ള പ്രമുഖര്‍ രംഗത്തെത്തിയിരുന്നു.
അതേസമയം വെറ്ററന്‍ ഓപ്പണര്‍ മാര്‍ട്ടിന്‍ ഗപ്‌ടില്‍ ഇല്ലാതെയാണ് ബ്ലാക്ക് ക്യാപ്‌സ് ആദ്യ മത്സരത്തിനിറങ്ങുന്നത്. ന്യൂസിലന്‍ഡുമായുള്ള കരാര്‍ അവസാനിപ്പിച്ചതിനെ തുടര്‍ന്നാണ് താരം ടീമില്‍ നിന്നും പുറത്തായത്. ഈ സാഹചര്യത്തില്‍ ഡേവോണ്‍ കോണ്‍വെ - ഫിന്‍ അലന്‍ കൂട്ടുകെട്ടാകും കിവീസിനായി ഇന്നിങ്‌സ് ഓപ്പണ്‍ ചെയ്യുക.