ദുബായ് : ഐപിഎൽ രണ്ടാം പാദ മത്സരങ്ങൾക്കുള്ള മുംബൈ ഇന്ത്യൻസ് ടീമിന്‍റെ ഉപദേഷ്‌ടാവായി സച്ചിൻ ടെൻഡുൽക്കർ യു.എ.ഇയിലെത്തി. മുംബൈ ഇന്ത്യൻസ് തന്നെയാണ് തങ്ങളുടെ ട്വിറ്റർ പേജിലൂടെ മാസ്റ്റർ ബ്ലാസ്റ്റർ ടീമിനൊപ്പം ചേർന്ന കാര്യം അറിയിച്ചത്.
യുഎയിലെത്തിയ താരം ആറ് ദിവസം ക്വാറന്‍റൈനിൽ കഴിയും. തുടർന്ന് കൊവിഡ് ടെസ്റ്റിന് വിധേയനായ ശേഷം മുംബൈ ടീമിനൊപ്പം ചേരും. കൊവിഡ് പിടിപെട്ടതിനാൽ ഐപിഎല്ലിന്‍റെ ആദ്യ ഘട്ടത്തിൽ സച്ചിൻ ടീമിനൊപ്പം ഉണ്ടായിരുന്നില്ല.
കഴിഞ്ഞ ദിവസം മുംബൈ ഇന്ത്യൻസ് ക്യാപ്റ്റന്‍ രോഹിത് ശര്‍മ, പേസ് ബൗളര്‍ ജസ്പ്രീത് ബുംറ, സൂര്യകുമാര്‍ യാദവ് എന്നിവര്‍ കുടുംബസമേതം ചാര്‍ട്ടേഡ് വിമാനത്തിൽ അബുദാബിയിലെത്തിയിരുന്നു. ഇംഗ്ലണ്ടിനെതിരെ നടന്ന ടെസ്റ്റ് പരമ്പരയ്ക്കായി മാഞ്ചസ്റ്ററിലായിരുന്നു താരങ്ങൾ.