മുംബൈ :ഓസ്‌ട്രേലിയയ്‌ക്ക് എതിരായ ഒന്നാം ഏകദിനത്തില്‍ ഇന്ത്യയുടെ വിജയത്തില്‍ വലിയ പങ്കാണ് പേസര്‍ മുഹമ്മദ് ഷമിയ്‌ക്കുള്ളത്. മത്സരത്തില്‍ 10 ഓവറിൽ 51 റൺസ് വിട്ടുകൊടുത്ത് അഞ്ച് വിക്കറ്റുകളാണ് മുഹമ്മദ് ഷമി (Mohammed Shami) വീഴ്‌ത്തിയത്. ഓസീസ് ഓപ്പണര്‍ മിച്ചല്‍ മാര്‍ഷിന്‍റെ ആദ്യ ഓവറില്‍ തന്നെ മടക്കിക്കൊണ്ടായിരുന്നു ഷമി വിക്കറ്റ് വേട്ടയ്‌ക്ക് തുടക്കമിട്ടത്.
തുടര്‍ന്ന് സ്റ്റീവ് സ്‌മിത്ത്, മാർകസ് സ്‌റ്റോയിനിസ്, മാത്യു ഷോർട്ട്, സീൻ അബോട്ട് എന്നിവരെയും ഇരയാക്കിയാണ് താരം അഞ്ച് വിക്കറ്റ് നേട്ടം പൂര്‍ത്തിയാക്കിയത്. മത്സരത്തിലെ ഈ മിന്നും പ്രകടനത്തിന് ഷമിയെ അകമഴിഞ്ഞ് അഭിനന്ദിച്ചിരിക്കുകയാണ് മുന്‍ താരം മുഹമ്മദ് കൈഫ്.
ലോകത്തിലെ ഏറ്റവും അണ്ടറേറ്റഡ് പേസര്‍ ആണ് മുഹമ്മദ് ഷമിയെന്നാണ് മുഹമ്മദ് കൈഫ് പറയുന്നത് (Mohammad Kaif on Mohammed Shami after India vs Australia 1st ODI). സോഷ്യല്‍ മീഡിയ പ്ലാറ്റ്‌ഫോമായ എക്‌സിലാണ് കൈഫ് ഇക്കാര്യം എഴുതിയത്. തന്നെ സംബന്ധിച്ച് ഷമി ലോകകപ്പ് ഹീറോ ആണെന്നും കൈഫ് (Mohammad Kaif) തന്‍റെ എക്‌സ് പോസ്റ്റില്‍ വ്യക്തമാക്കുന്നുണ്ട്. ജസ്‌പ്രീത് ബുംറയും (Jasprit Bhumrah) മുഹമ്മദ് സിറാജും (Mohammed siraj) ഇന്ത്യയുടെ പ്ലേയിങ് ഇലവനില്‍ സ്ഥിരക്കാരായതോടെ പലപ്പോഴും ഷമിക്ക് ടീമിന് പുറത്തിരിക്കേണ്ട സാഹചര്യമാണ് നിലവിലുള്ളത്.
കഴിഞ്ഞ ഏഷ്യ കപ്പില്‍ ബുംറ കളിക്കാതിരുന്ന മത്സരങ്ങളില്‍ മാത്രമാണ് താരം ഇന്ത്യയുടെ പ്ലേയിങ് ഇലവനിലെത്തിയത്. നടക്കാനിരിക്കുന്ന ഏകദിന ലോകകപ്പിലും കാര്യങ്ങള്‍ സമാനമാവുമെന്നാണ് വിലയിരുത്തല്‍. അതേസമയം മൊഹാലിയില്‍ നടന്ന മത്സരത്തിലെ പ്രകടനത്തോടെ ചില റെക്കോഡുകള്‍ സ്വന്തമാക്കാനും 33-കാരനായ ഷമിക്ക് കഴിഞ്ഞിരുന്നു.