സിഡ്‌നി : ഓസ്ട്രേലിയൻ മുൻ താരം ഗ്ലെൻ മഗ്രാത്തിന് കൊവിഡ് സ്ഥിരീകരിച്ചു. ഇതോടെ തന്‍റെ മരണപ്പെട്ട ഭാര്യ ജെയ്‌നിന് ആദരവർപ്പിച്ച് നടത്തുന്ന ആഷസ് പരമ്പരയിലെ നാലാമത്തെ മത്സരം കാണാൻ താരം എത്തില്ല. എന്നാൽ താരം വെർച്വലായി പരിപാടികളിൽ പങ്കെടുക്കുമെന്നാണ് വിവരം.
സിഡ്‌നിയിൽ നടക്കുന്ന നാലാമത്തെ ആഷസ് ടെസ്റ്റ്, സ്തനാർബുദം ബാധിച്ച് മരിച്ച ജെയിന്‍ മഗ്രാത്തിന് ആദരം അർപ്പിച്ചുകൊണ്ടാണ് കളിക്കുന്നത്. ടെസ്റ്റിന്‍റെ മൂന്നാം ദിനം ജെയിന്‍ മഗ്രാത്ത് ഡേ എന്ന് വിശേഷിപ്പിച്ചുകൊണ്ടാണ് ആദരം നൽകുന്നത്. കൂടാതെ സ്തനാർബുദ രോഗികൾക്കായുള്ള ധനസമാഹരണവും സംഘടിപ്പിക്കുന്നുണ്ട്.