ന്യൂഡൽഹി: ബംഗ്ലാദേശിനെതിരായ ടെസ്റ്റ് പരമ്പരയിലുടനീളം മോശം പ്രകടനമാണ് ഇന്ത്യയുടെ റണ്‍ മെഷീൻ വിരാട് കോലി കാഴ്‌ചവെച്ചത്. പരമ്പരയിലെ ആദ്യ ടെസ്റ്റിലെ ആദ്യ ഇന്നിങ്സിൽ ഒരു റണ്‍സും രണ്ടാം ഇന്നിങ്സിൽ 19 റണ്‍സുമായി പുറത്താകാതെ നിന്ന കോലി രണ്ടാം ടെസ്റ്റിൽ ആദ്യ ഇന്നിങ്സിൽ 24 റണ്‍സും നിർണായകമായ രണ്ടാം ഇന്നിങ്സിൽ 1 റണ്‍സുമാണ് നേടിയത്. ഇപ്പോൾ താരത്തിന്‍റെ പ്രകടനത്തെ വിമർശിച്ച് രംഗത്തെത്തിയിരിക്കുകയാണ് ബാല്യകാല പരിശീലകനായ രാജ്‌കുമാർ ശർമ.
വിരാട് കോലി പുറത്താകുന്ന രീതി സ്വീകാര്യമല്ലെന്നാണ് രാജ്‌കുമാർ ശർമ വ്യക്‌തമാക്കിയിരിക്കുന്നത്. ക്രിക്കറ്റിൽ ഒരു ബാറ്റർ പുറത്താകുന്നത് വലിയ കാര്യമല്ല. എന്നാൽ ബംഗ്ലാദേശിനെതിരായ ടെസ്റ്റിൽ കോലി പുറത്തായ രീതി സ്വീകാര്യമല്ല. കോലിയെപ്പോലൊരു ക്ലാസ് ബാറ്റർ ബംഗ്ലാദേശ് സ്‌പിന്നർമാർക്കെതിരെ മോശം രീതിയിൽ പുറത്താകുന്നത് നിർഭാഗ്യകരമാണ്. അദ്ദേഹം കൂടുതൽ ശ്രദ്ധിക്കണമായിരുന്നു.