ന്യൂഡല്‍ഹി: സിംബാബ്‌വെയ്‌ക്കെതിരായ ഏകദിന പരമ്പരയ്‌ക്കായി ഇന്ത്യന്‍ സംഘം പുറപ്പെട്ടു. ക്യാപ്‌റ്റന്‍ കെഎല്‍ രാഹുലും പരിശീലകന്‍ വിവിഎസ് ലക്ഷ്‌മണുമാണ് സംഘത്തിന് നേതൃത്വം നല്‍കുന്നത്. കളിക്കാരുടെ യാത്രയുടെ ചിത്രങ്ങള്‍ ബിസിസിഐ ട്വീറ്റ് ചെയ്‌തിട്ടുണ്ട്.
വെറ്ററന്‍ താരം ശിഖര്‍ ധവാന്‍, പ്രസിദ്ധ് കൃഷ്‌ണ, ദീപക് ചഹാര്‍, ശാര്‍ദുല്‍ താക്കൂര്‍, റിതുരാജ് ഗെയ്‌ക്‌വാദ്, രാഹുല്‍ ത്രിപാഠി, മുഹമ്മദ് സിറാജ് തുടങ്ങിയ താരങ്ങളാണ് ചിത്രത്തിലുള്ളത്. ഞായറാഴ്‌ച(14.08.2022) തന്നെ സംഘം പരിശീലനത്തിനിറങ്ങും. നേരത്തെ ശിഖർ ധവാനെയാണ് പരമ്പരക്കായുള്ള ടീമിന്‍റെ നായക സ്ഥാനത്തേക്ക് നിശ്ചയിച്ചിരുന്നത്. എന്നാൽ പരിക്കിൽ നിന്നും മുക്‌തനായി തിരിച്ചെത്തിയതോടെ നറുക്ക് രാഹുലിന് വീഴുകയായിരുന്നു.