ബെംഗളൂരു : കായിക ക്ഷമതയുള്‍പ്പടെയുള്ള കാരണങ്ങളാല്‍ ക്രിക്കറ്റില്‍ പുരുഷ വനിത താരങ്ങള്‍ക്ക് വെവ്വേറെ മത്സരങ്ങളാണ് നടക്കാറുള്ളത്. എന്നാല്‍ പരിശീലനത്തിനിറങ്ങുമ്പോള്‍ ഇത്തരം വേര്‍തിരിവുകള്‍ക്ക് സ്ഥാനമില്ല. ഇപ്പോഴിതാ ഇന്ത്യയുടെ വെറ്ററന്‍ വനിത പേസര്‍ ജൂലൻ ഗോസ്വാമിയെ നെറ്റ്സിൽ നേരിടുന്ന കെഎൽ രാഹുലിന്‍റെ വീഡിയോ സോഷ്യൽ മീഡിയയിൽ വൈറലാവുകയാണ്.
ബെംഗളൂരുവിലെ ദേശീയ ക്രിക്കറ്റ് അക്കാദമിയിലാണ് ഇരുവരും ഒന്നിച്ച് പരിശീലനത്തിനിറങ്ങിയത്. രാഹുലിനെതിരെ ജൂലന്‍റെ രണ്ട് ഡെലിവറികളടങ്ങിയതാണ് വീഡിയോ. ജൂലന്‍റെ ആദ്യത്തെ ഫുൾ ലെങ്ത് ഡെലിവറിയില്‍ കവർ ഡ്രൈവ് കളിച്ച താരം, രണ്ടാമത്തെ ഷോട്ട് ബോളില്‍ ബാക്ക് ഫൂട്ടിൽ നിന്ന് ഓഫ് സൈഡിൽ കട്ട് ചെയ്യുന്നതും വീഡിയോയില്‍ കാണാം.