മുംബൈ : പ്രഥമ ലോക ടെസ്റ്റ് ചാമ്പ്യന്‍ഷിപ്പ് ഫൈനലില്‍ ഇന്ത്യന്‍ ടീമില്‍ യുവതാരം റിഷഭ് പന്തിന്‍റെ പ്രകടനം നിര്‍ണായകമാവുമെന്ന് മുന്‍ വിക്കറ്റ് കീപ്പറും സെലക്ടറുമായ കിരണ്‍ മോറെ. വിക്കറ്റിന് പിന്നിലും പന്തിന് മികച്ച പ്രകടനം പുറത്തെടുക്കാന്‍ കഴിയുമെന്ന് കരുതുന്നതായും മോറെ ആത്മവിശ്വാസം പ്രകടിപ്പിച്ചു.
ലോക ടെസ്റ്റ് ചാമ്പ്യന്‍ഷിപ്പിലും ഇംഗ്ലണ്ടിനെതിരായ പരമ്പരയിലും റിഷഭ് പന്ത് ഒരിക്കല്‍ കൂടി നിര്‍ണായകമാകുമെന്നാണ് കരുതുന്നത്. കരിയറിലെ ഏറ്റവും മികച്ച ഫോമിലാണ് താരം.
ബാറ്റിങ്ങിന് ഏത് പൊസിഷനിലും ഇറങ്ങി മത്സരം മാറ്റിമറിക്കാനാകുമെന്ന് പന്തിന് ആത്മവിശ്വാസം വന്നതായി തോന്നുന്നു. താരം നിലയുറപ്പിച്ച് കഴിഞ്ഞതായി വിശ്വസിക്കുന്നുവെന്നും മോറെ പറഞ്ഞു.