കേപ്‌ടൗണ്‍: അടുത്തിടെ അവസാനിച്ച ഇന്ത്യയുടെ ദക്ഷിണാഫ്രിക്കന്‍ (India vs South Africa) പര്യടനത്തിനിടെ സ്റ്റേഡിയത്തില്‍ 'റാം സിയ റാം' എന്ന ഗാനം ഉയര്‍ന്ന് കേട്ടിരുന്നു. ഇന്ത്യന്‍ വംശജനായ ഓള്‍റൗണ്ടര്‍ കേശവ് മഹാരാജ് ഗ്രൗണ്ടില്‍ ഇറങ്ങുമ്പോഴായിരുന്നു പാന്‍ ഇന്ത്യന്‍ ചിത്രം ആദിപുരുഷിലെ പ്രസ്‌തുത ഗാനം ഉയര്‍ന്നുകേട്ടത്. മത്സരത്തിനിടെ ഇന്ത്യന്‍ വിക്കറ്റ് കീപ്പര്‍ കെഎല്‍ രാഹുല്‍ ഇതേക്കുറിച്ച് കേശവ് മഹാരാജിനോട് ചോദിക്കുകയും ചെയ്‌തിരുന്നു. ഇപ്പോഴിതാ ഇതിന്‍റെ കാരണം തുറന്നു പറഞ്ഞിരിക്കുകയാണ് കേശവ് മഹാരാജ്.
'റാം സിയ റാം' എന്ന ഗാനം തന്നെ സംബന്ധിച്ച് ഏറെ പ്രിയപ്പെട്ടതാണ്. സ്റ്റേഡിയത്തില്‍ ഇറങ്ങുമ്പോള്‍ പ്രസ്‌തുത ഗാനമിടാന്‍ താന്‍ അഭ്യര്‍ത്ഥിച്ചിരുന്നതായും കേശവ് മഹാരാജ് പറഞ്ഞു. (Keshav Maharaj on playing Ram Siya Ram Song during India series). ഇതു സംബന്ധിച്ച് 33-കാരനായ താരം ഒരു വാര്‍ത്ത ഏജന്‍സിയോട് നടത്തിയ പ്രതികരണം ഇങ്ങനെ....
"സ്റ്റേഡിയത്തില്‍ മ്യൂസിക് കൈകാര്യം ചെയ്യുന്ന വനിതയോട് ആ ഗാനം പ്ലേ ചെയ്യാൻ ഞാന്‍ അഭ്യർത്ഥിച്ചിരുന്നു. എന്നെ സംബന്ധിച്ചിടത്തോളം, എനിക്ക് മാർഗനിർദേശവും അവസരങ്ങളും നൽകിയ ദൈവം ഏറ്റവും വലിയ അനുഗ്രഹമാണ്. അതിനാൽ, ഇതെനിക്ക് ചെയ്യാന്‍ കഴിയുന്ന ഏറ്റവും ചെറിയ കാര്യമാണ്. 'റാം സിയ റാം' കേട്ടുകൊണ്ട് ഗ്രൗണ്ടിലേക്ക് ഇറങ്ങുന്ന അനുഭവം ഏറെ മികച്ചതാണ്" കേശവ് മഹാരാജ് പറഞ്ഞു.
കേപ്‌ടൗണില്‍ നടന്ന രണ്ടാം ടെസ്റ്റില്‍ കേശവ് മഹാരാജ് ബാറ്റുചെയ്യാന്‍ ഇറങ്ങുമ്പോള്‍ 'റാം സിയ റാം' ഗാനം മുഴങ്ങിയപ്പോള്‍ വില്ലുകുലച്ച് അമ്പ് തൊടുക്കുന്നതായുള്ള ഇന്ത്യയുടെ സ്റ്റാര്‍ ബാറ്റര്‍ വിരാട് കോലിയുടെ ആംഗ്യം ശ്രദ്ധേയമായിരുന്നു.