കൊല്‍ക്കത്ത:സയ്യിദ് മുഷ്‌താഖ് അലി ട്രോഫി ടി20 ടൂര്‍ണമെന്‍റില്‍ സൗരാഷ്‌ട്രയോട് തോറ്റ് കേരളം പ്രീക്വാര്‍ട്ടറില്‍ പുറത്ത്. വാശിയേറിയ മത്സരത്തിൽ 9 റണ്‍സിനായിരുന്നു സൗരാഷ്‌ട്രയുടെ ജയം. സൗരാഷ്‌ട്രയുടെ 184 റണ്സ് വിജയലക്ഷ്യം പിന്തുടര്‍ന്ന കേരളത്തിന് 20 ഓവറില്‍ നാല് വിക്കറ്റിന് 174 റണ്‍സെടുക്കാനേ കഴിഞ്ഞുള്ളൂ.
നായകന്‍ സഞ്ജു സാംസണിന്‍റെയും (59) സച്ചിന്‍ ബേബിയുടേയും (64) അര്‍ധസെഞ്ചുറികള്‍ കേരളത്തെ തുണച്ചില്ല. മത്സരത്തിൽ ആദ്യം ബാറ്റ് ചെയ്‌ത സൗരാഷ്‌ട്ര അർധസെഞ്ച്വറി നേടിയ ഷെൽഡൻ ജാക്‌സന്‍റെ (44 പന്തിൽ 64) ബാറ്റിങ് മികവിലാണ് മികച്ച സ്‌കോർ കണ്ടെത്തിയത്. സമർഥ് വ്യാസ് (34), വിശ്വരാജ് സിൻഹ ജഡേജ (31) എന്നിവരും മികച്ച ബാറ്റിങ് കാഴ്‌ചവെച്ചു. കേരളത്തിന് വേണ്ടി കെ.എം ആസിഫ് മൂന്ന് വിക്കറ്റുകൾ വീഴ്‌ത്തി. മനുകൃഷ്‌ണൻ രണ്ടും മിഥുൻ എസ് ഒരു വിക്കറ്റും നേടി.