ന്യൂഡല്‍ഹി: ഇന്ത്യയില്‍ കൊവിഡ് രൂക്ഷമായിരിക്കെ ഐപിഎല്ലില്‍ നിന്നും കളിക്കാര്‍ക്ക് പിന്നാലെ അമ്പയർമാരും പിന്മാറുന്നു. ഐസിസി എലൈറ്റ് പാനലിലുള്ള ഇന്ത്യൻ അമ്പയർ നിതിൻ മേനോൻ, ഓസീസ് അമ്പയർ പോൾ റെയ്ഫൽ എന്നിവരാണ് പിന്മാറിയത്. കുടുംബാംഗങ്ങള്‍ക്ക് കൊവിഡ് സ്ഥിരീകരിച്ചതോടെയാണ് നിതിന്‍ മേനോന്‍ പിന്മാറിയത്.
നിതിന്‍ മേനോന്‍റെ ഭാര്യയ്ക്കും അമ്മയ്ക്കുമാണ് കൊവിഡ് സ്ഥിരീകരിച്ചത്. ഐപില്ലിന്‍റെ ബയോ ബബിളില്‍ നിന്നും അദ്ദേഹം പുറത്ത് കടന്നതായാണ് വിവരം. ഇക്കാര്യം ബിസിസിഐ ഉദ്യോഗസ്ഥര്‍ സ്ഥിരീകരിച്ചിട്ടുണ്ട്. 'നിതിന്‍ മേനോന്‍ ഐപിഎല്‍ വിട്ടതായും, കുടുംബാംഗങ്ങള്‍ക്ക് കൊവിഡ് സ്ഥിരീകരിച്ചതിനാല്‍ മത്സരങ്ങള്‍ നിയന്ത്രിക്കാനുള്ള മാനസികാവസ്ഥയിലല്ല അദ്ദേഹമുള്ളതെന്നും' ബിസിസിഐ ഉദ്യോഗസ്ഥര്‍ പ്രതികരിച്ചു.