ചെന്നൈ: രാജസ്ഥാന് റോയല്‍സിനെതിരായ മത്സരത്തില്‍ തകര്‍പ്പന്‍ പ്രകടനമാണ് ചെന്നൈ സൂപ്പര്‍ കിങ്‌സിന്‍റെ സ്റ്റാര്‍ ഓള്‍റൗണ്ടര്‍ രവീന്ദ്ര ജഡേജ നടത്തിയത്. ആദ്യം പന്തെറിഞ്ഞപ്പോള്‍ രണ്ട് വിക്കറ്റ് വീഴ്‌ത്തിയ താരം ബാറ്റിങ്ങിനിറങ്ങി 25 റണ്‍സും നേടിയിരുന്നു. നാലോവറില്‍ 21 റണ്‍സ് മാത്രം വഴങ്ങിയായിരുന്നു ജഡേജ രണ്ട് വിക്കറ്റ് സ്വന്തമാക്കിയത്.
ദേവ്ദത്ത് പടിക്കല്‍, സഞ്‌ജു സാംസണ്‍ എന്നിവരായിരുന്നു ചെപ്പോക്കില്‍ രവീന്ദ്ര ജഡേജയ്‌ക്ക് മുന്നില്‍ വീണത്. ഇരുവരെയും ഒരേ ഓവറിലാണ് ജഡേജ മടക്കിയത്. രാജസ്ഥാനെതിരായ രണ്ട് വിക്കറ്റ് പ്രകടനത്തോടെ ഐപിഎല്ലില്‍ ടി20 ക്രിക്കറ്റില്‍ 200 വിക്കറ്റുകള്‍ നേടുന്ന ഒമ്പതാമത്തെ ഇന്ത്യന്‍ താരമെന്ന നേട്ടം സ്വന്തമാക്കാനും ജഡേജയ്‌ക്കായി.
ചെന്നൈ രാജസ്ഥാന് മത്സരത്തിന്‍റെ ഒമ്പതാം ഓവറിലായിരുന്നു ജഡേജ സന്ദര്‍ശകര്‍ക്ക് ഇരട്ടപ്രഹരമേല്‍പ്പിച്ചത്. ഓവറിന്‍റെ മൂന്നാം പന്തില്‍, 25 പന്തില്‍ 38 റണ്‍സ് നേടി നിന്ന പടിക്കലിനെയാണ് ജഡേജ പുറത്താക്കിയത്. ചെന്നൈ താരത്തെ സ്വീപ്പ് ചെയ്യാനായിരുന്നു ദേവ്‌ദത്തിന്‍റെ ശ്രമം.
എന്നാല്‍ താരത്തിന്‍റെ ഷോട്ട് സ്ക്വയര്‍ ലെഗില്‍ ഫീല്‍ഡ് ചെയ്‌തിരുന്ന ഡെവോണ്‍ കോണ്‍വെ കൈപ്പിടിയിലൊതുക്കി. അഞ്ചാം പന്തിലാണ് റണ്‍സൊന്നുമെടുക്കാതെ സഞ്‌ജു വീണത്. ബാക്ക് ഫുട്ടില്‍ സഞ്‌ജു കളിച്ചെങ്കിലും ടേണ്‍ ചെയ്‌തെത്തിയ പന്ത് രാജസ്ഥാന് നായകന്‍റെ സ്റ്റംപ് തെറിപ്പിക്കുകയായിരുന്നു.
സഞ്‌ജു സാംസണിന്‍റെ വിക്കറ്റ് നേട്ടത്തോടെയായിരുന്നു ജഡേജ ടി20 ക്രിക്കറ്റില്‍ 200 വിക്കറ്റ് പൂര്‍ത്തിയാക്കിയത്. ജഡേജ ടി20 ക്രിക്കറ്റില്‍ നേടിയ 200-ല്‍ 138 വിക്കറ്റും പിറന്നത് ഐപിഎല്ലിലാണ്. ഐപിഎല്‍ കരിയറിലെ 214-ാം മത്സരത്തിലാണ് ജഡേജയുടെ ഈ നേട്ടം.