മുംബെെ: കൊവിഡിനെ തുടര്‍ന്ന് നിര്‍ത്തിവെച്ച ഐപിഎല്ലില്‍ നിന്നും സ്വദേശത്തേക്ക് മടങ്ങുന്നതിനിടെ രാജസ്ഥാൻ റോയൽ‌സിന്‍റെ യുവ താരം യശസ്വി ജയ്‌സ്വാളിന് തന്‍റെ ബാറ്റ് സമ്മാനിച്ച് ഇംഗ്ലീഷ് ഓപ്പണർ ജോസ് ബട്‌ലർ. 19കാരനായ താരത്തിന് പ്രത്യേക സന്ദേശമെഴുതിയാണ് ബട്‌ലർ ബാറ്റ് സമ്മാനിച്ചത്. ഇതിന്‍റെ ചിത്രങ്ങള്‍ ടീം ട്വിറ്ററില്‍ പങ്കുവച്ചിട്ടുണ്ട്.
read more: 'നമുക്ക് മനോഹരമായ ചില ചിരികളും ഓര്‍മ്മകളുമുണ്ട്'; ബാർബോറയ്ക്ക് ആശംസകള്‍ നേര്‍ന്ന് സാനിയ
'യാഷിന്, നിന്‍റെ കഴിവുകൾ ആസ്വദിക്കൂ. ആശംസകൾ' എന്നാണ് ബാറ്റിന് പുറത്ത് ബട്ട്ലര്‍ തന്‍റെ കെെപ്പടയില്‍ എഴുതിയിരിക്കുന്നത്. അതേസമയം കഴിഞ്ഞ മൂന്ന് മത്സരങ്ങളില്‍ രാജസ്ഥാനായി ഇരുവരും ഓപ്പണിങ്ങിനിറങ്ങിയിരുന്നു. പരിക്കേറ്റ് പുറത്തായ ബെന്‍സ്റ്റോക്സിന് പകരമാണ് ബട്‌ലർ ഓപ്പണറായി എത്തിയത്. ആദ്യ നാല് മത്സരങ്ങളില്‍ പുറത്തിരുന്ന ജയ്‌സ്വാളിന് മനാന്‍ വോറയുടെ മോശം പ്രകടനമാണ് ടീമിലേക്ക് വഴി തുറന്നത്.