മുംബൈ :ഐപിഎല്‍ പതിനാറാം പതിപ്പില്‍ ഗുജറാത്ത് ടൈറ്റന്‍സിന് പിന്നാലെ ചെന്നൈ സൂപ്പര്‍ കിങ്സ്, ലഖ്‌നൗ സൂപ്പര്‍ ജയന്‍റ്‌സ് എന്നീ ടീമുകള്‍ സീസണിലെ തങ്ങളുടെ അവസാന ലീഗ് മത്സരത്തിന് പിന്നാലെയായിരുന്നു പ്ലേഓഫില്‍ ഇടം പിടിച്ചത്. 18 പോയിന്‍റോടെ ഒന്നാം സ്ഥാനത്താണ് നിലവിലെ ചാമ്പ്യന്മാരായ ഗുജറാത്ത്. 17 പോയിന്‍റോടെ ചെന്നൈ രണ്ടാം സ്ഥാനക്കാരായും ലഖ്‌നൗ മൂന്നാമന്‍മാരായുമാണ് പ്ലേഓഫില്‍ സ്ഥാനം ഉറപ്പിച്ചത്.
ശേഷിക്കുന്ന ഒരു സ്ഥാനത്ത് എത്തുന്ന ടീം ഏതായിരിക്കും എന്ന് ഇന്നാണ് അറിയാന്‍ സാധിക്കുക. മുംബൈ ഇന്ത്യന്‍സിനും റോയല്‍ ചലഞ്ചേഴ്‌സ് ബാംഗ്ലൂരിനും ഇന്ന് നടക്കുന്നത് ജീവന്‍മരണ പോരാട്ടങ്ങളാണ്. അതേസമയം, പോയിന്‍റ് പട്ടികയിലെ അഞ്ചാം സ്ഥാനക്കാരായ രാജസ്ഥാന് റോയല്‍സും ഇന്നത്തെ മത്സരങ്ങളെ പ്രതീക്ഷയോടെയാണ് നോക്കിക്കാണുന്നത്.
14 പോയിന്‍റാണ് നിലവില്‍ ബാംഗ്ലൂര്‍, രാജസ്ഥാന്, മുംബൈ ടീമുകള്‍ക്ക് ഉള്ളത്. നെറ്റ് റണ്‍റേറ്റിന്‍റെ അടിസ്ഥാനത്തില്‍ ഇന്ന് മത്സരമുള്ള ആര്‍സിബി (0.180) നാലാം സ്ഥാനത്തും മുംബൈ ഇന്ത്യന്‍സ് (-0.128) ആറാം സ്ഥാനത്തുമാണ്. ഇന്ന് ഇരു ടീമുകളും ജയിച്ചാല്‍ നെറ്റ് റണ്‍റേറ്റിന്‍റെ അടിസ്ഥാനത്തില്‍ മുന്നിലുള്ള ടീം ആയിരിക്കും പ്ലേഓഫിലേക്ക് കുതിക്കുക.
മുംബൈ ബാംഗ്ലൂര്‍ ടീമുകളില്‍ ഒരു കൂട്ടര്‍മാത്രമാണ് ജയിക്കുന്നതെങ്കില്‍ അവരാകും നാലാം സ്ഥാനക്കാരായി പ്ലേഓഫ് കളിക്കാന്‍ ടിക്കറ്റെടുക്കുന്നത്. ഇങ്ങനെ സംഭവിച്ചാല്‍ കഴിഞ്ഞ വര്‍ഷത്തെ ഫൈനലിസ്റ്റുകളായ രാജസ്ഥാന് റോയല്‍സിന് അഞ്ചാം സ്ഥാനക്കാരോ ആറാം സ്ഥാനക്കാരോ ആയി മടങ്ങേണ്ടിവരും. എന്നാല്‍, ഇന്ന് മുംബൈ ഇന്ത്യന്‍സും റോയല്‍ ചലഞ്ചേഴ്‌സ് ബാംഗ്ലൂരും തോല്‍ക്കുകയാണെങ്കില്‍ രാജസ്ഥാന് പ്രതീക്ഷയ്‌ക്ക് വകയുണ്ട്.