ചെന്നൈ: ഐപിഎല്‍ പതിനാലാം പതിപ്പിന്‍റെ ഭാഗമാകുന്ന 61 പേര്‍ ആരൊക്കെയെന്നറിയന്‍ ഇനി മണിക്കൂറുകള്‍ മാത്രം. ചെന്നൈയില്‍ ഇന്ന് വൈകീട്ട് മൂന്നിന് ആരംഭിക്കുന്ന മിനി താരലേലത്തില്‍ 164 ഇന്ത്യക്കാര്‍ ഉള്‍പ്പെടെ 292 പേര്‍ ഭാഗ്യം പരീക്ഷിക്കും. ലേലത്തില്‍ ഏറ്റവും കൂടുതല്‍ തുക മുടക്കാന്‍ സാധിക്കുക പഞ്ചാബ് കിങ്സ് ഇലവനാണ്. 53.2 കോടി രൂപ പഞ്ചാബിനും 35.40 കോടി രൂപ രണ്ടാം സ്ഥാനത്തുള്ള റോയല്‍ ചലഞ്ചേഴ്‌സ് ബാംഗ്ലൂരിനും ലേലത്തിനിറക്കാം. ഏറ്റവും കുറവ് തുകയുമായി ലേലത്തിനെത്തുന്ന കൊല്‍ക്കത്ത നൈറ്റ് റൈഡേഴ്‌സിനും സണ്‍റൈസേഴ്‌സ് ഹൈദരാബാദിനും 10.75 കോടി വീതമാണ് ഉപയോഗിക്കാന്‍ സാധിക്കുക. ലേലത്തിനെത്തുന്ന താരങ്ങളുടെ പട്ടികയില്‍ പ്രായക്കൂടുതല്‍ 42 കാരന്‍ നയന്‍ ദോഷിക്കാണ്. 16 വയസുള്ള അഫ്‌ഗാനിസ്ഥാന്‍ സ്‌പിന്നര്‍ നൂര്‍ അഹമ്മദാണ് ഇളമുറക്കാരന്‍.
മലയാളികളായ അഞ്ച് പേരാണ് ഇത്തവണ ലേലത്തിന്‍റെ ഭാഗമാകുക. സച്ചിന്‍ ബേബി, വിഷ്‌ണു വിനോദ്, മുഹമ്മദ് അസ്‌ഹറുദ്ദീന്‍, എംഡി നിതീഷ്, കരുണ്‍ നായര്‍ എന്നിവരില്‍ ആരെല്ലാം ഇത്തവണ ഐപിഎല്ലിനുണ്ടാകുമെന്നറിയാനുള്ള കാത്തിരിപ്പിന് ഇനി മണിക്കൂറുകളെ ബാക്കിയുള്ളൂ. അഞ്ച് പേരും ആഭ്യന്തര ക്രിക്കറ്റില്‍ ഇതിനകം മികച്ച പ്രകടനം പുറത്തെടുത്തവരാണ്.
ഏറ്റവും ഉയര്‍ന്ന അടിസ്ഥാന വിലയായ രണ്ട് കോടി രൂപയുടെ പട്ടികയില്‍ രണ്ട് ഇന്ത്യക്കാര്‍ ഉള്‍പ്പെടെ 10 പേരാണുള്ളത്. ഒന്നരക്കോടി അടിസ്ഥാന വിലയുള്ള 12 പേരില്‍ ഇന്ത്യക്കാര്‍ ആരുമില്ല. ഒരു കോടി വിലയിട്ടവരുടെ പട്ടികയില്‍ ഹനുമാ വിഹാരി, ഉമേഷ് യാദവ് തുടങ്ങിയവരാണുള്ളത്.