അഹമ്മദാബാദ്: ഇന്ത്യന്‍ പ്രീമിയര്‍ ലീഗ് (ഐപിഎല്‍) ക്രിക്കറ്റില്‍ മുംബൈ ഇന്ത്യന്‍സിനെതിരെ ഗുജറാത്ത് ടൈറ്റന്‍സ് ആദ്യം ബാറ്റ് ചെയ്യും. ടോസ് നേടിയ മുംബൈ ഇന്ത്യന്‍സ് നായകന്‍ രോഹിത് ശര്‍മ ബോളിങ് തെരഞ്ഞെടുക്കുകയായിരുന്നു. ഐപിഎല്‍ 16-ാം സീസണിലെ 35-ാം മത്സരമാണിത്.
ഗുജറാത്തിന്‍റെ തട്ടകമായ അഹമ്മദാബാദിലെ നരേന്ദ്ര മോദി സ്റ്റേഡിയത്തിലാണ് കളി നടക്കുന്നത്. ഏറെ ഉറച്ച പിച്ചാണിതെന്ന് മുംബൈ ഇന്ത്യന്‍സ് നായകന്‍ രോഹിത് ശര്‍മ പറഞ്ഞു. സാഹചര്യങ്ങൾ പരമാവധി പ്രയോജനപ്പെടുത്താൻ ആഗ്രഹിക്കുന്നു.
തുടക്കത്തില്‍ കുറച്ച് തെറ്റുകള്‍ സംഭവിച്ചു. അത് അംഗീകരിച്ച് തിരുത്തി എങ്ങനെ മുന്നോട്ട് പോകുന്നു എന്നതാണ് പ്രധാനമെന്നും താരം പറഞ്ഞു. കഴിഞ്ഞ മത്സരത്തിലെ പ്ലേയിങ്‌ ഇലവനില്‍ രണ്ട് മാറ്റങ്ങളുമായാണ് മുംബൈ ഇന്ത്യന്‍സ് കളിക്കുന്നത്. ഹൃത്വിക് ഷോക്കീൻ പുറത്തായപ്പോള്‍ കുമാർ കാർത്തികേയയാണ് പ്ലേയിങ്‌ ഇലവനിലെത്തിയത്.
ജോഫ്ര ആര്‍ച്ചര്‍ക്ക് പകരം റിലെ മെറിഡിത്തും ടീമിലെത്തി. ആര്‍ച്ചര്‍ക്ക് സുഖമില്ലെന്ന് രോഹിത് അറിയിച്ചു. മലയാളി താരങ്ങളായ വിഷ്‌ണു വിനോദ്, സന്ദീപ് വാര്യർ എന്നിവര്‍ മുംബൈ ഇന്ത്യന്‍സിന്‍റെ പകരക്കാരുടെ പട്ടികയില്‍ ഇടം നേടിയിട്ടുണ്ട്.
വിക്കറ്റ് നല്ലതായാണ് കാണപ്പെടുന്നതെന്ന് ഗുജറാത്ത് നായകന്‍ ഹാര്‍ദിക് പാണ്ഡ്യ പ്രതികരിച്ചു. കഴിഞ്ഞ മത്സരത്തിലെ പ്ലേയിങ്‌ ഇലവനില്‍ മാറ്റമില്ലാതെയാണ് ഗുജറാത്ത് ടൈറ്റന്‍സ് കളിക്കുന്നതെന്നും ഹാര്‍ദിക് കൂട്ടിച്ചേര്‍ത്തു.
മുംബൈ ഇന്ത്യൻസ് (പ്ലേയിങ്‌ ഇലവൻ): രോഹിത് ശർമ (ക്യാപ്റ്റന്‍), ഇഷാൻ കിഷൻ (വിക്കറ്റ് കീപ്പര്‍), കാമറൂൺ ഗ്രീൻ, സൂര്യകുമാർ യാദവ്, ടിം ഡേവിഡ്, നെഹാൽ വാധേര, കുമാർ കാർത്തികേയ, അർജുൻ ടെണ്ടുൽക്കർ, റിലേ മെറിഡിത്ത്, പിയൂഷ് ചൗള, ജേസൺ ബെഹ്‌റൻഡോർഫ്.