മുംബൈ: ഇന്ത്യൻ പ്രീമിയർ ലീഗിൽ പഞ്ചാബ് കിങ്സിനെതിരെ രാജസ്ഥാൻ റോയൽസിന് 190 റണ്‍സ് വിജയലക്ഷ്യം. ടോസ് നേടി ബാറ്റിങ്ങിനിറങ്ങിയ പഞ്ചാബ് നിശ്ചിത 20 ഓവറിൽ അഞ്ച് വിക്കറ്റ് നഷ്‌ടത്തിൽ 189 റണ്‍സ് നേടി. അർധ സെഞ്ച്വറി നേടിയ ജോണി ബെയർസ്റ്റോയുടേയും അവസാന ഓവറുകളിൽ തകർത്തടിച്ച ജിതേഷ് ശർമ്മയുടേയും, ലിയാം ലിവിങ്സ്റ്റന്‍റെയും മികവിലാണ് പഞ്ചാബ് കൂറ്റൻ സ്കോർ കണ്ടെത്തിയത്.
ടോസ് നേടി ബാറ്റിങ്ങിനിറങ്ങിയ പഞ്ചാബിന് സ്റ്റാർ ഓപ്പണർ ശിഖർ ധവാന്‍റെ(12) വിക്കറ്റ് അഞ്ചാം ഓവറിൽ തന്നെ നഷ്‌ടമായി. തുടർന്നെത്തിയ ഭാനുക രാജപക്‌സയെ കൂട്ടുപിടിച്ച് പഞ്ചാബ് സ്കോർ ഉയർത്തി. എന്നാൽ സ്കോർ 89ൽ നിൽക്കെ രാജപക്‌സെ(27) പുറത്തായി. തുടർന്നെത്തിയ നായകൻ മായങ്ക് അഗർവാളിനെ കൂട്ടുപിടിച്ച് ബെയർസ്റ്റോ ടീം സ്കോർ 100 കടത്തി.