മുംബൈ: ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിനെതിരെ പഞ്ചാബ് കിങ്സിന് ബാറ്റിങ്. ടോസ് നേടിയ പഞ്ചാബ് നായകൻ മായങ്ക് അഗർവാൾ ബാറ്റിങ് തെരഞ്ഞെടുക്കുകയായിരുന്നു. പഞ്ചാബ് കഴിഞ്ഞ മത്സരത്തിലെ അതേ ടീമിനെ നിലനിർത്തിയപ്പോൾ രാജസ്ഥാൻ കരുണ്‍ നായറിന് പകരം യശ്വസി ജെയ്‌സ്വാളിനെ ടീമിൽ ഉൾപ്പെടുത്തി
സീസണില്‍ ഇരു സംഘവും തങ്ങളുടെ 11ാം മത്സരത്തിനാണിറങ്ങുന്നത്. കളിച്ച 10 മത്സരങ്ങളില്‍ അറ് ജയമുള്ള രാജസ്ഥാന് നിലവിലെ പോയിന്‍റ് പട്ടികയില്‍ മൂന്നാം സ്ഥാനത്തും, പത്തില്‍ അഞ്ച് ജയങ്ങളുള്ള പഞ്ചാബ് ഏഴാം സ്ഥാനത്തുമാണ്. ഇതോടെ മുന്നോട്ടുള്ള കുതിപ്പിന് ഇരുവര്‍ക്കും വിജയം അനിവാര്യമാണ്. സീസണില്‍ ഇതാദ്യമായാണ് പഞ്ചാബും രാജസ്ഥാനും നേര്‍ക്കുനേര്‍ വരുന്നത്.
ക്യാപ്റ്റന്‍ സഞ്ജു സാംസണിന് പുറമെ, ജോസ് ബട്‌ലര്‍, ഷിമ്രോണ്‍ ഹെറ്റ്‌മെയര്‍, യുസ്‌വേന്ദ്ര ചാഹല്‍, ആര്‍ അശ്വിന്‍, കുല്‍ദീപ് സെന്‍, ടെന്‍റ് ബോള്‍ട്ട് തുടങ്ങിയ താരങ്ങളുടെ പ്രകടനം രാജസ്ഥാന് നിര്‍ണായകമാവും. മറുവശത്ത് കഴിഞ്ഞ സീസണില്‍ രാജസ്ഥാന്‍റെ താരമായിരുന്ന ലിയാം ലിവിങ്‌സ്റ്റണിന്‍റെ മിന്നുന്ന ഫോം പഞ്ചാബിന് കരുത്താണ്. ജോണി ബെയര്‍സ്റ്റോ, ശിഖര്‍ ധവാന്‍, ഭാനുക രജപക്‌സെ, കാഗിസോ റബാഡ, അർഷ്‌ദീപ് സിങ് എന്നിവരിലാണ് പഞ്ചാബിന് പ്രതീക്ഷ.