പൂനെ:ഐപിഎല്ലിൽ ആദ്യ ജയത്തിനായി മുംബൈ ഇന്ത്യൻസ് ഇന്നിറങ്ങും. ഇന്നത്തെ മല്‍സരത്തില്‍ പഞ്ചാബ് കിങ്‌സാണ് മുംബൈയുടെ എതിരാളികള്‍. രാത്രി ഏഴരയ്ക്ക് പുനെയിലാണ് മത്സരം. സീസണിലെ ആദ്യത്തെ നാലു മല്‍സരങ്ങളിലും തോറ്റ രോഹിത് ശര്‍മയുടെ മുംബൈയ്ക്കു ഇനിയൊരു പരാജയം താങ്ങാനാവില്ല.
നേരത്തേയും സമാനമായ തിരിച്ചടികളെ മറികടന്ന് ശക്തമായ തിരിച്ചുവരവ് നടത്തി കിരീടം വരെ നേടിയ ചരിത്രമുള്ള ടീമാണ് മുംബൈ. ഒരു മല്‍സരം പോലും ജയിച്ചിട്ടില്ലാത്ത മുംബൈ നിലവില്‍ പോയിന്‍റ് പട്ടികയില്‍ അവസാന സ്ഥാനത്താണ്. മായങ്ക് അഗര്‍വാള്‍ നയിക്കുന്ന പഞ്ചാബ് അപകടകാരികളാണ്. അത്കൊണ്ടുതന്നെ ഏറ്റവും മികച്ച പ്രകടനം പുറത്തെടുത്താൽ മാത്രമെ മുംബൈയ്‌ക്ക് പഞ്ചാബിനെ മറികടക്കാനാകൂ.
ബാറ്റിംഗിലും ബോളിംഗിലും സ്ഥിരതയില്ലായ്‌മയാണ് മുംബൈ നേരിടുന്ന പ്രധാന വെല്ലുവിളി. ഇഷാൻ കിഷനും സൂര്യകുമാർ യാദവും ക്രീസിലുറച്ചാൽ വമ്പൻ സ്കോറിലെത്താം. മികവിലേക്കുയരുന്ന തിലക് വർമയിലും ഡെവാൾഡ് ബ്രൂയിസിലും പ്രതീക്ഷയേറെ.