പൂനെ: ഇന്ത്യൻ പ്രീമിയർ ലീഗിൽ ഇന്നത്തെ രണ്ടാം മത്സരത്തിൽ കൊൽക്കത്ത നൈറ്റ് റൈഡേഴ്‌സ് ലഖ്‌നൗ സൂപ്പർ ജയന്‍റ്സിനെ നേരിടും. രാത്രി 7.30ന് പൂനെയിലാണ് മത്സരം. പോയിന്‍റ് പട്ടികയിൽ രണ്ടാം സ്ഥാനത്തുള്ള ലഖ്‌നൗവിനെ സംബന്ധിച്ച് ഇന്നത്തെ മത്സരം ജയിച്ച് പ്ലേ ഓഫിൽ കടക്കുയാകും ലക്ഷ്യം. എന്നാൽ പോയിന്‍റ് പട്ടികയിൽ എട്ടാം സ്ഥാനത്തുള്ള കൊൽക്കത്തെയെ സംബന്ധിച്ച് ഇന്നത്തെ മത്സരം ജീവൻ മരണ പോരാട്ടമാണ്.
ബാറ്റിങ് ബോളിങ് നിര ഒരുപോലെ സന്തുലനം പാലിക്കുന്നു എന്നതാണ് ലഖ്‌നൗ സൂപ്പർ ജയന്‍റ്സിന്‍റെ വിജയത്തിനാധാരം. നായകൻ കെഎൽ രാഹുലും ക്വിന്‍റണ്‍ ഡി കോക്കും ചേരുന്ന ഓപ്പണിങ് സഖ്യം തന്നെയാണ് ടീമിന്‍റെ പ്രധാന കരുത്ത്. മധ്യനിരയിൽ മനീഷ്‌ പണ്ഡെ, മാർക്കസ് സ്റ്റോയിൻസ്, ദീപക് ഹൂഡ എന്നിവർ കൂടി ചേരുന്നതോടെ ടീമിന്‍റെ കരുത്ത് വർധിക്കുന്നു. ക്രൂണാൽ പണ്ഡ്യ, ജേസൻ ഹോൾഡർ, ആയുഷ്‌ ബധേനി എന്നിവരുൾപ്പെട്ട ഓൾറൗണ്ട് നിരയും ദുഷ്‌മന്ത ചമീര, ആവേശ് ഖാൻ, രവി ബിഷ്‌ണോയ് എന്നിവരടങ്ങിയ ബോളിങ് നിരയും ശക്‌തരാണ്.