മുംബൈ: ഇന്ത്യൻ പ്രീമിയർ ലീഗിൽ കൊൽക്കത്ത നൈറ്റ് റൈഡേഴ്‌സിനെതിരെ പഞ്ചാബ് കിങ്സിന് ഭേദപ്പെട്ട സ്‌കോർ. ആദ്യ ബാറ്റ് ചെയ്‌ത പഞ്ചാബ് കിങ്സിന് 18.2 ഓവറിൽ 137 റണ്‍സിന് ഓൾഔട്ട് ആവുകയായിരുന്നു. നാല് വിക്കറ്റ് വീഴ്‌ത്തിയ ഉമേഷ് യാദവാണ് പഞ്ചാബ് നിരയുടെ നട്ടെല്ലൊടിച്ചത്.
ഒൻപത് പന്തിൽ 31 റണ്‍സ് നേടിയ ഭാനുക രാജപക്‌സയ്‌ക്കും അവസാന ഓവറുകളിൽ തകർത്തടിച്ച കാഗിസോ റബാഡയ്‌ക്കും മാത്രമാണ് പഞ്ചാബ് നിരയിൽ തിളങ്ങാനായത്. ടോസ് നഷ്‌ടപ്പെട്ട് ബാറ്റിങ്ങിനിറങ്ങിയ പഞ്ചാബിന്‍റെ തുടക്കം തന്നെ തകർച്ചയോടെയായിരുന്നു. ആദ്യ ഓവറിൽ തന്നെ നായകൻ മായങ്ക് അഗർവാളിനെ (1) നഷ്‌ടമായി. എന്നാൽ പിന്നീട് ക്രീസിലെത്തിയ ഭാനുക തകർപ്പൻ ഷോട്ടുകളുമായി കളം നിറഞ്ഞു. മൂന്നാം ഓവർ എറിയാനെത്തിയ ശിവം മാവിയെ തുടർച്ചയായ മൂന്ന് സിക്‌സുകൾക്ക് പ്രഹരിച്ച ഭാനുക എന്നാൽ ഓവറിലെ അഞ്ചാം പന്തിൽ ക്യാച്ച് നൽകി പുറത്തായി.
ഭാനുക വീണതോടെ പഞ്ചാബ് നിരയും തകർന്നു. ടീം സ്‌കോർ 62ൽ നിൽക്കെ ഓപ്പണർ ശിഖർ ധവാൻ (16) പുറത്തായി. പിന്നാലെ ലിയാം ലിവിങ്‌സ്റ്റണ്‍ (19), രാജ് ബാവ (11), ഷാറൂഖ് ഖാൻ (0) എന്നിവർ പെട്ടന്ന് തന്നെ കൂടാരം കയറി. പിന്നാലെ ക്രീസിലെത്തിയ ഹർപ്രീത് ബ്രാർ (14) ഒഡ്‌യൻ സ്‌മിത്തിനെ കൂട്ടുപിടിച്ച് ടീം സ്‌കോർ 100 കടത്തി. പിന്നാലെ ഹർപ്രീതും പുറത്തായി.