മുംബൈ:ഇന്ത്യൻ സൂപ്പർ ലീഗിൽ കൊൽക്കത്ത നൈറ്റ് റൈഡേഴ്‌സിനെതിരെ ഡൽഹി ക്യാപ്പിറ്റൽസിന് നാല് വിക്കറ്റിന്‍റെ തകർപ്പൻ ജയം. കൊൽക്കത്ത ഉയർത്തിയ 147 റണ്‍സ് പിന്തുടർന്നിറങ്ങിയ ഡൽഹി 19 ഓവറിൽ ആറ് വിക്കറ്റ് നഷ്‌ടത്തിൽ ലക്ഷ്യം മറികടക്കുകയായിരുന്നു. 16 പന്തിൽ മൂന്ന് സിക്‌സിന്‍റെയും ഒരു ഫോറിന്‍റെയും അകമ്പടിയോടെ 33 റണ്‍സെടുത്ത റോവ്മാൻ പവലിന്‍റെ ബാറ്റിങാണ് ഡൽഹിക്ക് അനായാസ വിജയം നേടിക്കൊടുത്തത്. 42 റണ്‍സ് നേടിയ ഓപ്പണർ ഡേവിഡ് വാർണറും, കൊൽക്കത്തയുടെ നാല് വിക്കറ്റ് വീഴ്‌ത്തിയ കുൽദീപ് യാദവും ഡൽഹിയുടെ വിജയത്തിൽ നിർണായക പങ്ക് വഹിച്ചു.
വിജയലക്ഷ്യം പിന്തുടർന്ന് മറുപടി ബാറ്റിങ്ങിനിറങ്ങിയ ഡൽഹിക്ക് ഓപ്പണർ പൃഥ്വി ഷായെ ആദ്യ പന്തിൽ തന്നെ നഷ്‌ടമായി. പിന്നാലെയെത്തിയ മിച്ചൽ മാർഷിനും (13) കാര്യമായൊന്നും ചെയ്യാനായില്ല. തുടർന്ന് ലളിത് യാദവിനെ കൂട്ടുപിടിച്ച് വാർണർ സ്‌കോർ ഉയർത്തിയെങ്കിലും ടീം സ്‌കോർ 82ൽ നിൽക്കെ വാർണറേയും (42) ഡൽഹിക്ക് നഷ്‌ടമായി. തൊട്ടടുത്ത ഓവറുകളിൽ തന്നെ ലളിത് യാദവ്(22), റിഷഭ് പന്ത്(2) എന്നിവർ മടങ്ങിയതോടെ ഡൽഹിയുടെ നില പരുങ്ങലിലായി.