മുംബൈ :ഇന്ത്യൻ സൂപ്പർ ലീഗിൽ ലഖ്‌നൗ സൂപ്പർ ജയന്‍റ്‌സിനെതിരെ ചെന്നൈ സൂപ്പർ കിങ്സിന് കൂറ്റൻ സ്കോർ. ടോസ്‌ നഷ്‌ടപ്പെട്ട് ബാറ്റിങ്ങിനിറങ്ങിയ ചെന്നൈ 20 ഓവറിൽ 7 വിക്കറ്റ് നഷ്‌ടത്തിൽ 210 റണ്‍സ് നേടി. അർധശതകം പൂർത്തിയാക്കിയ റോബിൻ ഉത്തപ്പയുടേയും 49 റണ്‍സിന് പുറത്തായ ശിവം ദുബെയുടെയും ബാറ്റിങ് മികവിലാണ് ചെന്നൈ കൂറ്റൻ സ്കോർ കണ്ടെത്തിയത്.
ടോസ്‌ നേടി ബൗളിങ് തെരഞ്ഞെടുത്ത നായകൻ കെഎൽ രാഹുലിന്‍റെ പ്രതീക്ഷക്കൊത്തായിരുന്നു ലഖ്‌നൗ ഇന്നിങ്സ് ആരംഭിച്ചത്. ചെന്നൈ ഓപ്പണർ ഋതുരാജ് ഗെയ്‌ക്‌വാദിനെ(1) രണ്ടാം ഓവറിൽ തന്നെ മടക്കി അയക്കാൻ അവർക്കായി. എന്നാൽ പിന്നീടൊന്നിച്ച മൊയിന്‍ അലി റോബിൻ ഉത്തപ്പ സഖ്യം ചെന്നൈ സ്കോർ വേഗത്തിൽ ഉയർത്തി. ഇതിനിടെ ടീം സ്കോർ 84ൽ നിൽക്കെ ഉത്തപ്പ(50) പുറത്തായി.
എന്നാൽ തുടർന്ന് ക്രീസിലെത്തിയ ശിവം ദുബെ മൊയിന്‍ അലിയെ കൂട്ടുപിടിച്ച് തകർപ്പനടി തുടർന്നു. ഇരുവരും ചേർന്ന് ടീം സ്കോർ 100 കടത്തി. ടീം സ്കോർ 106ൽ നിൽക്കെ മൊയിൻ അലിയെ(35) ചെന്നൈക്ക് നഷ്‌ടമായി. പിന്നാലെ ക്രീസിലെത്തിയ അമ്പാട്ടി റായ്‌ഡുവും ലഖ്‌നൗ ബൗളർമാരെ പ്രഹരിച്ചുകൊണ്ടിരുന്നു.