ദുബായ്‌ : ഐപിഎല്ലിൽ ഇന്നത്തെ മത്സരത്തിൽ റോയൽ ചലഞ്ചേഴ്‌ ബാംഗ്ലൂർ രാജസ്ഥാൻ റോയൽസിനെ നേരിടും. രാത്രി 7.30 ന് ദുബായിലാണ് മത്സരം. രാജസ്ഥാനെ സംബന്ധിച്ച് പ്ലേ ഓഫ് സാധ്യതകൾ നിലനിർത്താൻ ഇന്നത്തെ മത്സരത്തിലെ വിജയം ഏറെ നിർണായകമാണ്. ആദ്യ പാദത്തിൽ ഇരു ടീമുകളും ഏറ്റുമുട്ടിയപ്പോൾ ബാംഗ്ലൂർ പത്ത് വിക്കറ്റിന്‍റെ വൻ വിജയം സ്വന്തമാക്കിയിരുന്നു.
പട്ടികയിൽ 12 പോയിന്‍റുമായി മൂന്നാം സ്ഥാനത്തുള്ള ബാംഗ്ലൂരിനെ സംബന്ധിച്ച് ഇന്നത്തെ മത്സരത്തിൽ വിജയിച്ച് ആദ്യ നാലിലെ സ്ഥാനം ഒന്നുകൂടി ഊട്ടി ഉറപ്പിക്കാനാകും ശ്രമിക്കുക. മറുവശത്ത് എട്ട് പോയിന്‍റുമായി ഏഴാംസ്ഥാനത്തുള്ള രാജസ്ഥാന് ഇന്ന് വിജയിച്ചേ മതിയാകൂ.
വിദേശ താരങ്ങളുടെ കൊഴിഞ്ഞുപോക്ക് കാരണം രണ്ടാം പാദത്തിൽ താരങ്ങളുടെ കാര്യത്തിൽ ഏറ്റവും ദുർബലരായ ടീമാണ് രാജസ്ഥാൻ. ക്യാപ്റ്റൻ സഞ്ജു സാംസന്‍റെ ഒറ്റയാൾ പോരാട്ടത്തിലൂടെയാണ് ടീം മുന്നോട്ട് പോകുന്നത്. ഇന്ത്യൻ ദേശീയ ടീമിൽ കളിച്ച സഞ്ജുവും ഉനദ്‌കട്ടും മാത്രമാണ് ടീമിലെ രാജ്യാന്തര താരങ്ങൾ.