ദുബൈ:ഐപിഎല്ലിൽ പ്ലേ ഓഫ് സാധ്യതകൾ ഉറപ്പിക്കാൽ കൊൽക്കത്ത നൈറ്റ് റൈഡേഴ്‌സും പഞ്ചാബ് കിങ്സും ഇന്ന് ഏറ്റുമുട്ടും. രാത്രി 7.30 ന് ദുബായിൽ ആണ് മത്സരം. 11 മത്സരങ്ങളിൽ നിന്ന് 10 പോയിന്‍റുമായി നാലാം സ്ഥാനത്തുള്ള കൊൽക്കത്തക്കും അത്ര തന്നെ മത്സരങ്ങളിൽ നിന്ന് 8 പോയിന്‍റുമായി ആറാം സ്ഥാനത്തുള്ള പഞ്ചാബിനും ഇന്നത്തെ മത്സരം ഏറെ നിർണായകമാണ്.
ആദ്യ പാദത്തിൽ നിന്ന് ഏറെ വ്യത്യസ്‌തമായാണാ കൊൽക്കത്ത രണ്ടാം പാദത്തിൽ കളിക്കുന്നത്. രണ്ടാം പാദത്തിൽ കളിച്ച നാല് കളികളിൽ മൂന്നിലും ടീം മികച്ച വിജയം സ്വന്തമാക്കി. റോയൽ ചലഞ്ചേഴ്‌സ് ബാംഗ്ലൂർ, ഡൽഹി ക്യാപ്പിറ്റൽസ്, മുംബൈ ഇന്ത്യൻസ് എന്നീ വമ്പൻ ടീമുകളോടാണ് കൊൽക്കത്ത വിജയം നേടിയത്. ചെന്നൈക്കെതിരെ മാത്രമാണ് ടീമിന് തോൽവി വഴങ്ങേണ്ടി വന്നത്.
ഓപ്പണർ വെങ്കിടേഷ് അയ്യർ തന്നെയാണ് ടീമിന്‍റെ പ്രധാന ശക്‌തി. ബാറ്റിങിലും ബോളിങ്ങിലും താരം ഒരു പോലെ തിളങ്ങുന്നുണ്ട്. ക്യാപ്റ്റൻ മോർഗൻ ഒഴിച്ച് മറ്റ് താരങ്ങളെല്ലാം തന്നെ ഫോമിലാണ്. കഴിഞ്ഞ മത്സരത്തിൽ പരിക്ക് കാരണം കളിക്കാതിരുന്ന ആന്ദ്രേ റസൽ ഇന്നത്തെ മത്സരത്തിലും കളിക്കാൻ സാധ്യതയില്ല.