ദുബായ്‌ : ചെന്നൈ സൂപ്പർ കിങ്സിനെതിരെ അനായാസ വിജയവുമായി പഞ്ചാബ് കിങ്സ്. ചെന്നൈ ഉയർത്തിയ 134 റണ്‍സ് എന്ന വിജയ ലക്ഷ്യം ആറ് വിക്കറ്റും 42 ബോളും ശേഷിക്കെയാണ് പഞ്ചാബ് മറികടന്നത്. തുടക്കം മുതൽ തകർത്തടിച്ച ക്യാപ്‌റ്റൻ കെ.എൽ രാഹുലാണ്(42 ബോൾ 98 റണ്‍സ്) പഞ്ചാബിന്‍റെ വിജയ ശിൽപ്പി.
വിജയിക്കാനാവശ്യമായ സ്കോറിന്‍റെ മുക്കാൽ ഭാഗവും ഒറ്റയ്ക്ക് നേടിയാണ് രാഹുൽ പഞ്ചാബിന് മിന്നുന്ന വിജയം നേടിക്കൊടുത്തത്. ഇതോടെ, 13 കളികളിൽ നിന്ന് 62.60 ശരാശരിയിൽ 626 റണ്‍സുമായി രാഹുൽ റൺവേട്ടക്കാരുടെ പട്ടികയിൽ മുന്നിലെത്തി.
14 മത്സരങ്ങളിൽനിന്ന് 546 റൺസുമായി ഇതേ മത്സരത്തിലൂടെ ഒന്നാമതെത്തിയ ചെന്നൈ സൂപ്പർ കിങ്സ് ഓപ്പണർ ഫഫ് ഡു പ്ലസിയെയാണ് പിന്നിലാക്കിയത്. മായങ്ക് അഗര്‍വാള്‍ (12), സര്‍ഫറാസ് ഖാന്‍ (0), ഷാരൂഖ് ഖാന്‍ (8), എയ്‌ഡന്‍ മാര്‍ക്രം (13) എന്നിവരാണ് പുറത്തായ താരങ്ങള്‍.