അബുദാബി : ഐപിഎല്ലിലെ ഇന്നത്തെ രണ്ടാമത്തെ മത്സരത്തിൽ പഞ്ചാബ് കിങ്സിനെതിരെ ടോസ് നേടിയ മുംബൈ ഇന്ത്യൻസ് ബൗളിങ് തെരഞ്ഞെടുത്തു. രണ്ട് മാറ്റങ്ങളുമായാണ് മുംബൈ ഇന്ന് മത്സരിക്കാനിറങ്ങുന്നത്.
ഇഷാൻ കിഷന് പകരം സൗരവ് തിവാരിയേയും, ആദം മിൽനെക്ക് പകരം നാഥാൻ കോട്ടർനില്ലിനെയും ടീമിൽ ഉൾപ്പെടുത്തി. പഞ്ചാബ് നിരയിൽ പരിക്കേറ്റ മായങ്ക് അഗർവാളിന് പകരം മന്ദീപ് സിങ്ങാണ് ഇറങ്ങുന്നത്.
ഇരു ടീമുകൾക്കും പത്ത് മത്സരങ്ങളിൽ നിന്ന് എട്ട് പോയിന്‍റാണുള്ളത്. പ്ലേ ഓഫിൽ കടന്നുകൂടാൻ ഇരു ടീമുകൾക്കും വിജയം അനിവാര്യമായതിനാൽ വാശിയേറിയ പോരാട്ടത്തിനാകും ഇന്ന് അബുദാബി ക്രിക്കറ്റ് സ്റ്റേഡിയം സാക്ഷ്യം വഹിക്കുക. ആദ്യ പാദത്തിൽ ഇരുടീമുകളും ഏറ്റുമുട്ടിയപ്പോൾ വിജയം പഞ്ചാബിനൊപ്പമായിരുന്നു.
ബാറ്റിങ്ങിലാണ് ഇരു ടീമുകളുടേയും പ്രധാന പോരായ്‌മ. മുംബൈ നിരയിൽ ക്യാപ്റ്റൻ രോഹിത് ശർമ അല്ലാതെ ബാറ്റിങ്ങിൽ ആരും തിളങ്ങുന്നില്ല. പഞ്ചാബ് നിരയിലും ക്യാപ്റ്റൻ കെ.എൽ രാഹുലും മായങ്ക് അഗർവാളും ഒഴിച്ച് മറ്റാരും തന്നെ ഫോമിലില്ല.