അബുദാബി : പഞ്ചാബ് കിങ്‌സിനെതിരെ മുംബൈ ഇന്ത്യൻസിന് 136 റണ്‍സ് വിജയലക്ഷ്യം. ടോസ് നഷ്‌ടപ്പെട്ട് ബാറ്റിങ്ങിനിറങ്ങിയ പഞ്ചാബിനെ 20 ഓവറിൽ ആറ് വിക്കറ്റ് നഷ്ടത്തിൽ 135 റണ്‍സിന് മുംബൈ ബൗളർമാർ എറിഞ്ഞൊതുക്കുകയായിരുന്നു. 29 പന്തിൽ 42 റണ്‍സ് നേടിയ എയ്‌ഡന്‍ മര്‍ക്രത്തിന്‍റെയും 28 റണ്‍സ് നേടിയ ദീപക് ഹൂഡയുടേയും മികവിലാണ് പഞ്ചാബ് പൊരുതാവുന്ന സ്കോറിലേക്ക് എത്തിച്ചേർന്നത്.
ഓപ്പണർമാരായ കെഎൽ രാഹുലും മന്ദീപ് സിങും മികച്ച രീതിയിൽ തുടങ്ങിയെങ്കിലും ടീം സ്കോർ 36ൽ വെച്ച് മന്ദീപിനെ വിക്കറ്റിന് മുന്നിൽ കുരുക്കി ക്രുണാൽ പാണ്ഡ്യയാണ് ആദ്യ വിക്കറ്റെടുത്തത്. തൊട്ടുപിന്നാലെ ഒരു റണ്‍സെടുത്ത ക്രിസ് ഗെയിലിനെ കീറോണ്‍ പൊള്ളാർഡ് മടക്കി അയച്ചു. ഓവറിലെ തന്നെ നാലാം പന്തിൽ കെഎൽ രാഹുലിനെ(21 റണ്‍സ്) പുറത്താക്കി പൊള്ളാർഡ് പഞ്ചാബ് നിരയെ ഞെട്ടിച്ചു.
അടുത്ത ഓവറിൽ രണ്ട് റണ്‍സെടുത്ത നിക്കോളാസ് പുരാനെ ബുംറ വിക്കറ്റിന് മുന്നിൽ കുരുക്കി. 48- 4 എന്ന നിലയിൽ വൻ തകർച്ചയിലേക്ക് നീങ്ങിക്കൊണ്ടിരുന്ന ടീമിനെ എയ്‌ഡന്‍ മര്‍ക്രവും ദീപക് ഹൂഡയും ചേർന്നാണ് കരകയറ്റിയത്.