ദുബായ്‌ : ഐപിഎല്ലിൽ ഇന്ന് രണ്ട് മത്സരങ്ങൾ. ആദ്യ മത്സരത്തിൽ കരുത്തരായ ഡൽഹി ക്യാപ്പിറ്റൽസും രാജസ്ഥാൻ റോയൽസും തമ്മിൽ ഏറ്റുമുട്ടുമ്പോൾ രണ്ടാം മത്സരത്തിൽ സണ്‍റൈസേഴ്‌സ് ഹൈദരാബാദ് പഞ്ചാബ് കിങ്സിനെ നേരിടും. ഇന്നത്തെ മത്സരത്തിൽ വിജയിച്ച് പോയിന്‍റ് പട്ടികയിൽ ഒന്നാം സ്ഥാനത്തേക്കെത്താനാണ് ഡൽഹിയുടെ ശ്രമമെങ്കിൽ വിജയത്തോടെ പ്ലേ ഓഫ് സാധ്യതകൾ നിലനിർത്താനാകും രാജസ്ഥാൻ ശ്രമിക്കുക.
ഇന്ത്യയുടെ യുവ താരങ്ങളായ റിഷഭ് പന്ത് നയിക്കുന്ന ഡൽഹിയും സഞ്ജു സാംസണ്‍ നയിക്കുന്ന രാജസ്ഥാനും തമ്മിൽ ഏറ്റുമുട്ടുമ്പോൾ കനത്ത മത്സരത്തിന് അബുദാബിയിലെ ക്രിക്കറ്റ് സ്റ്റേഡിയം സാക്ഷ്യം വഹിക്കും. ആദ്യ പാദത്തിലും രണ്ടാം പാദത്തിലും മികച്ച പ്രകടനവുമായാണ് ഇരു ടീമുകളും മുന്നേറുന്നത്. ഒൻപത് മത്സരങ്ങളിൽ നിന്ന് 14 പോയിന്‍റുമായി രണ്ടാം സ്ഥാനത്താണ് ഡൽഹി. എട്ട് മത്സങ്ങളിൽ നിന്ന് എട്ട് പോയിന്‍റുമായി അഞ്ചാം സ്ഥാനത്താണ് രാജസ്ഥാൻ.
ഇരു ടീമുകളും ആകെ 23 മത്സരങ്ങളിൽ ഏറ്റുമുട്ടിയുപ്പോൾ 12 എണ്ണത്തിലും വിജയം രാജസ്ഥാനൊപ്പമായിരുന്നു. ആദ്യ പാദത്തിൽ ഇരുവരും തമ്മിൽ ഏറ്റുമുട്ടിയപ്പോൾ വിജയം രാജസ്ഥാനൊപ്പമായിരുന്നു. ഇന്നാൽ രണ്ടാം വരവിൽ മത്സരം രാജസ്ഥാന് അത്ര എളുപ്പമാകില്ല.